VOV4.Êđê - Ăt hlăm hdră nao čhưn, Khua lăn čar Nguyễn Xuân Phúc mâo leh klei bi tuôm hŏng Khamtai Siphandone, Khua kiă kriê hđăp mơ̆ng Đảng, Khua lăn čar hđăp; Choummaly Sayasone, Khua gĭt gai Đảng hđăp, Khua lăn čar hđăp lehanăn Bounnhang Vorachith, jing Khua kiă kriê hđăp mơ̆ng Đảng, Khua lăn čar hđăp ala čar Lao. Ti anôk bi tuôm, Khua lăn čar Nguyễn Xuân Phúc bi êdah klei m’ak dưi bi tuôm wĭt hŏng phung ayŏng adei, jing mah jiăng sĭt suôr mơ̆ng Đảng, Knŭk kna lehanăn mnuih ƀuôn sang Việt Nam. Phung khua kiă kriê gưl dlông hđăp mơ̆ng Lao bi êdah klei m’ak ti anăp klei đĭ kyar jăk siam hlăm klei bi mjĕ, hgŭm mguôp plah wah dua Đảng, dua Knŭk kna lehanăn mnuih ƀuôn sang dua ala čar hlăm wưng êgao, bi mni kơ dŭm boh tŭ dưi mâo hlăm hdră bi trông čhai lehanăn bi tuôm, čiăng kơ dua tĭng mđing hĭn kơ hdră mjuăt bi hriăm lehanăn mtô mblang kơ mnuih ƀuôn sang dua ala čar, boh nik ênuk gưl hđeh kơ knhuah gru jăk siam, bi hgŭm sĭt suôr plah wah Lao - Việt Nam, Việt Nam - Lao./.

H Nêč pô mblang