VOV4.Êđê- Hlăm klei hriê čuă čhưn klă klơ̆ng Việt Nam, aguah mbruê, khua lăn čar Nguyễn Xuân Phúc mâo leh klei bi tuôm hŏng K’iăng khua mil čhil Mi Kamala Harris. Hlăm klei bi tuôm anăn, khua lăn čar Nguyễn Xuân Phúc mñă klă, Việt Nam srăng tui ngă hdră êlan hŏng tač êngao êngiê, čŏng ngă bruă lehanăn jing ƀĭng hgŭm mâo klei đăo knang. Đru bi mguôp hlăm klei êđăp ênang lehanăn mđĭ kyar tar rŏng lăn. Tui hluê anăn Việt Nam yap ala čar Mi jing sa hlăm dŭm ƀĭng hgŭm tal êlâo.

Việt Nam hmăng hmưi lŏ hrăm mbĭt hŏng Mi mđĭ klei mjĕ giăm kluôm ênŭm, ƀrư̆ hruê ƀrư̆ êlam, mâo klei jăk hrăm mbĭt tui hluê klei bhiăn mpŭ kơ klei dưi kiă kriê, kluôm ênŭm ala čar lehanăn klei kiă kriê hdơ̆ng pô. K’iăng khua mil čhil Mi Kamala Harris. Yap yuôm bhăn ala čar Việt Nam mâo lu klei gĭr hlăm bruă gang mkhư̆ klei ruă tưp Covid-19 lehanăn lŏ sa blư̆ mñă klei ƀuăn mơ̆ng Mi đru kơ ala čar Việt Nam msưh kdŭn klei ruă tưp Covid-19. 2 čô khua gĭt gai bi tŭ ư mđĭ klei mjĕ giăm leh anăn mtrŭt mđĭ klei bi mguôp lu bruă. boh nik jing bruă duh mkra, mnia mblei, bruă lĭng kahan, mgaih msir dŭm klei hmăi mơ̆ng klei mblah ngă, bruă mdrao mgŭn, klei mrâo mrang.

Pô mblang: Y-Ƀel Êban