VOV4.Êđê - Hlăm klei nao čhưn ti Lao, yang hrue dơ̆ng mbrue (10/8), ti ƀuôn prŏng phŭn Vientian, Khua lăn čar Nguyễn Xuân Phúc drông čhưn leh k’iăng khua lăn čar Lao Pany Yathotou, lehanăn k’iăng khua lăn čar lao Bounthong Chitmany. Ti anôk drông, Khua lăn čar Nguyễn Xuân Phúc mñă Đảng, Knŭk kna lehanăn phung ƀuôn sang Việt Nam yap yuôm lehanăn mâo klei duh mĭn tal êlâo hĭn čiăng bi kjăp, lehanăn mđĭ hĭn klei bi mguôp mâo leh mơ̆ng đưm, hlăm klei bi mguôp tliêr kjăp, lehanăn hgŭm bruă kluôm ênŭm Việt Nam – Lao. Khua lăn čar čang hmăng kơ dua nah lŏ dơ̆ng mâo klei hgŭm mbĭt hlăm djăp mta bruă, mjing klei găl kơ jih jang hdră srăng mâo hgŭm ngă jăk, mbĭt hŏng klei thâo bi đru hdơ̆ng găp, boh nik, dŭm alŭ wăl ktuê knông lăn dua ala čar, čiăng hrăm mbĭt đru bi gang mkhư̆ klei ruă tưp, lehanăn mđĭ kyar klei duh mkra ala ƀuôn, mđĭ hĭn bruă hâo hưn, mjuăt bi hriăm kơ klei bi mguôp yuôm bhăn Việt Nam - Lao, boh nik hŏng phung hđeh gưl mrâo./.

Y Khem pô mblang