VOV4.Êđê - Khua lăn čar Nguyễn Xuân Phúc mrâo gĭt gai Klei bi kƀĭn tal 3 Êpul hgŭm lĭng kahan leh anăn răng mgang klei êđăp ênang wưng thŭn 2016-2021. Khua lăn čar brei thâo Klei bi kƀĭn tal anei jing ksiêm wĭt wưng păn bruă, mbĭt anăn bi trông, bi tŭ ư dŭm boh phŭn yuôm bhăn, mjing tur knơ̆ng kơ bruă ngă mơ̆ng Êpul hgŭm lĭng kahan, răng mgang klei êđăp ênang hlăm wưng mrâo bi leh jăk bruă klam hluê si klei kčah mtrŭn mơ̆ng Hdră bhiăn phŭn leh anăn hdră bhiăn.

Khua lăn čar Nguyễn Xuân Phúc mñă klă, hlăm wưng ară anei, lăn čar dôk tlă anăp hŏng lu klei lông dlăng kơ klei êđăp ênang kreh mâo leh leh anăn ka tuôm mâo, hlăm anăn, klei bi mlih yan adiê, boh nik klei ruă Covid-19 dôk mâo dleh ktuê dlăng jing bruă prŏng mơ̆ng lăn čar. Boh klei anei brei êpul lĭng kahan, boh nik kahan ksiêm, lĭng kahan leh anăn phung ngă bruă hŏng tač êngao kƀĭn klei dưi mdrơ̆ng, răng mgang lu hĭn klei suaih pral leh anăn klei hdĭp mnuih ƀuôn sang. Ti anăp klei ruă tưp dleh ktuê dlăng ti lu čar nah Dhŭng, Khua lăn čar Nguyễn Xuân Phúc mtă Knŭk kna, dŭm phŭn, dhar bruă leh anăn bruă sang čư̆ êa dŭm alŭ wăl mđing djăp klei găl gang mkhư̆ klei ruă tưp, boh nik rơ̆ng djăp vaccin tlŏ mgang kơ mnuih ƀuôn sang.

H Zawut  pô mblang