VOV4.Êđê- Tŭ ư klei iêo jăk mơ̆ng Khua knŭk kna New Zealand, aguah mbruê, Khua lăn čar Nguyễn Xuân Phúc kčưm leh hdră nao hgŭm hlăm klei kƀĭn trông gưl dlông APEC tal 28 mơ̆ng hruê 11 – 12/11 hŏng êlan online. Aguah mbruê, Khua lăn čar Nguyễn Xuân Phúc mơĭt leh klei hưn mdah truh kơ dŭm knơ̆ng bruă APEC hŏng klei mă rup êlâo. Iêo mthưr dŭm anôk bruă duh mkra APEC duh bi liê kơ mgi đih hlăm dŭm hdră pui kmlă doh, mđĭ kyar kdrăp mrâo mrang mrâo hŏng klei yuôm mtah ƀrư̆ hruê ƀrư̆ đi.

Khua lăn čar lŏ iêo mthưr kơ dŭm anôk bruă duh mkra APEC, dŭm knơ̆ng bruă leh anăn ƀĭng hgŭm tar rŏng lăn duh bi liê mđĭ kyar mtah ti Việt Nam. Čiăng dưi ngă dŭm bruă kñăm đĭ kyar, đĭ kyar mtah, kjăp, Khua lăn čar Nguyễn Xuân Phúc mñă ktang bruă klam mơ̆ng dŭm knơ̆ng bruă. Hlăm anăn mâo klei đĭ kyar hŏng hnơ̆ng êwa čhŏ carbon ƀiă, mđĭ kyar mtah ăt jing klei găl mđĭ hĭn klei bi ktưn, mđĭ kyar kjăp mơ̆ng knơ̆ng bruă.

Pô mblang: Y-Khem Niê