VOV4.Êđê - Hlăm klei nao čhưn kơ ala čar Lao, aguah mbrue (10/8), Khua lăn čar Nguyễn Xuân Phúc mâo leh klei blŭ hrăm yuôm bhăn ti anôk bruă kƀĭn ala Lao, hlăk hlăm klei bi kƀĭn tal sa Bruă kƀĭn ala gưl 9. Khua lăn čar bi êdah klei myun dưi jing tue mơ̆ng ala tač êngao tal êlâo mâo blŭ hrăm hlăm sang bi kƀĭn mrâo ti anăp bruă kƀĭn ala gưl 9 ala čar Lao. Klei khua lăn čar Nguyễn Xuân Phúc blŭ lŏ bi hdơr knhuah gru hƀuê ênuk kdrăm k’ah klei bi mguôp dua ala čar. Khua lăn čar lač, klei bi mguôp bruă kđi čar, hlăm bruă klam yuôm bhăn mơ̆ng klei hgŭm plah wah bruă kƀĭn ala dua ala čar. Klei sa ai mơ̆ng bruă kƀĭn ala dua ala čar srăng jing anôk knang kjăp hlăm klei bhiăn čiăng kơ klei hgŭm mâo klei tŭ dưn hĭn mơ̆ng knŭk kna, mơ̆ng bruă mặt trận, dŭm alŭ wăl, djăp êpul bruă yang ƀuôn lehanăn dưn yua jih klei gĭr, klei mbruă mơ̆ng phung duh mkra, mơ̆ng phung ƀuôn sang dua ala čar. Mjưh ruĕ klei blŭ hrăm, Khua lăn čar Nguyễn Xuân Phúc lač, Dua ala čar mnăm mbĭt sa hnoh êa Mekong, bi knang mbĭt sa duôr čư̆ prŏng kdrăm k’ah, lăn ala yan adiê mâo leh mơ̆ng đưm msĕ si lŏ hyuă kjăp hĭn nanao hlăm djăp ênuk, hrăm mbĭt bi đru, hrăm mbĭt đĭ nao kơ mdrŏng sah./.

Y Khem pô mblang