VOV4.Êđê - Khua lăn čar Nguyễn Xuân Phúc hŏng mô̆ ñu Trần Nguyệt Thu leh anăn Êpul bi ala gưl dlông Đảng, Knŭk kna Việt Nam wĭt truh leh ti tač êdeh phiơr Nội Bài, ƀuôn prŏng phŭn Hà Nội, mjưh ruê̆ jăk siam hdră nao čhưn klă sĭt ti Lào.  Anei jing gưl nao čhưn dua nah ala tač êngao klă sĭt tal êlâo mơ̆ng khua gĭt gai gưl dlông Đảng, knŭk Khua Knŭk kna drei leh Klei bi kƀĭn Đảng XIII; mbĭt anăn jing gưl nao čhưn kơ ala tač êngao tal êlâo mơ̆ng Nguyễn Xuân Phúc leh ngă Khua lăn čar. Hlăm wưng 2 hruê mơ̆ng 9-10/8, Khua lăn čar Nguyễn Xuân Phúc mâo leh êbeh 10 klei bi trông, bi tuôm gưl dlông. Phung hlăm Êpul ăt mâo leh 15 bruă bi tuôm, bi trông hŏng dŭm phŭn, dhar bruă, alŭ wăl ti ala čar Lao. Hlăm gưl nao čhưn, mâo leh 14 hră mơar bi hgŭm dưi bi siñê, bi trông plah wah dŭm phŭn, dhar bruă, anôk bruă mnia blei leh anăn alŭ wăl dua ala čar. Dŭm klei tŭ anei brei ƀuh, gưl nao čhưn mâo klei tŭ yuôm bhăn, mjing gru kruăk knăl mrâo hlăm klei ksŭl mbŭ klei bi hgŭm jăk siam leh anăn bi hgŭm kluôm ênŭm Việt Nam-Lào.

H Zawut pô mblang