VOV4.Êđê - Ƀri bi hdơr 20 thŭn hruê Gŏ sang Việt Nam 28-6, Khua lăn čar Nguyễn Xuân Phúc mơĭt leh klei hơêč hmưi kơ jih jang gŏ sang ti Việt Nam, hlăm anăn iêu mthưr grăp gŏ sang brei ngă bruă kyua sa Việt Nam gĭr lar bra kluôm rŏng lăn, kjăp ktang leh anăn mdrŏng sah. Hră mâo kdrêč: “Hlăm boh klei ruă tưp Covid-19 mâo dleh ktuê dlăng ti ala čar drei, lu knuă druh, aê mdrao, lĭng kahan amâo uêñ kơ klei dleh dlan nao hlăm anôk mâo klei ruă tưp. Gŏ sang yơh jih anôk jưh knang, mđĭ ai digơ̆ dưi găn klei dleh dlan bi leh bruă klam. Lu gŏ sang đru mguôp mnơ̆ng dhơ̆ng, ai tiê, bi hmô, mđĭ ai găp djuê hluê ngă jăk hdră êlan, hrăm mbĭt hŏng Đảng, Knŭk kna leh anăn jih bruă kđi čar hlăm hdră gang mkhư̆ klei ruă Covid-19 čiăng Việt Nam jing klei êdah êdi mâo ala čar dlông rŏng lăn bi mni. Kâo bi mni kơ dŭm gưl, dhar bruă, dŭm alŭ wăl, êpul bruă, mnuih hlăm kluôm ala êpul êya Việt Nam ti ala tač êngao mâo leh lu bruă jăk, đru mkŏ mjing gŏ sang Việt Nam jăk mơak, đĭ kyar hơĭt kjăp.”

H Zawut pô mblang