VOV4.Êđê- Ƀri bi hdơr 96 thŭn hruê hră klei mrâo cách mạng Việt Nam 21/6, Khua lăn čar Nguyễn Xuân Phúc mơĭt klei blŭ hơêč hmưi kơ jih jang mnuih mă bruă klei mrâo hlăm ala čar, lehanăn pah mni kơ dŭm bruă ngă tŭ klei dleh dlan, hur har hlăm bruă gang mkhư̆ klei ruă tưp Covid-19 hlăm dŭm hruê mmông êgao. Hlăm hră mơĭt mâo kdrêč “Ƀri bi hdơr hruê hră klei mrâo cách mạng Việt Nam, kâo mâo klei pah mni lehanăn čih yap yuôm bhăn dŭm čô knuă druh, phung čih klei mrâo, phung ngă bruă, mă rup hlăm dŭm anôk bruă klei mrâo tar ala čar hlăm dŭm hruê leh êgao. Kyua dŭm čô mă bruă klei mrâo yơh dưi đru mguôp klei siam hlăm knhuah gru klei mrâo Cách Mạng Việt Nam mơ̆ng khua gĭt gai Hồ Chí Minh mkŏ mjing lehanăn mtô mjuăt.”

 Khua lăn čar Nguyễn Xuân Phúc mâo leh klei êmuh kña, klei hơêč hmưi lehanăn mđup brei mnơ̆ng dhơ̆ng kơ dŭm čô čih klei mrâo kdlưn hĭn, hlăm anăn mâo pô mă bruă klei mrâo mduôn khua Đặng Minh Phương, 93 thŭn, êlâo dih mă bruă 3 hră klei mrâo Mơ̆ng Đảng, đru dŏng lăn čar krĭng dhŭng nah krah, čhiăm gru êngiê lehanăn mnuih ƀuôn sang. Ƀri bi hdrơr 96 thŭn hruê hră klei mrâo Cách Mạng Việt Nam, khua lăn čar Nguyễn Xuân Phúc mâo leh klei blŭ hơêč hmưi, klei êmuh kña kơ dŭm čô mă bruă klei mrâo mâo klei đru kơ bruă mđĭ kyar bruă klei mrâo Cách Mạng Việt Nam ./.

Pô mblang: Y-Ƀel Êban