VOV4.Êđê – Tlam mbruê 30/7, Khua lăn čar Nguyễn Xuân Phúc nao čhưn leh anăn mă bruă ti čar Bình Dương kơ hdră gang mkhư̆ klei ruă tưp Covid-19. Khua lăn čar mñă klă, čar Bình Dương jing alŭ wăl mâo bruă klam yuôm bhăn hlăm bruă mkăp brei mnơ̆ng dhơ̆ng hlăm bruă duh mkra ala čar Việt Nam, jing čar mâo ênoh mnuih ƀuôn sang lu êdi, lu knơ̆ng bruă, sang mkra mjing, jing anôk mnia blei hlăm krĭng Ngŏ Dhŭng Asi leh anăn ƀuôn prŏng Hồ Chí Minh. Kyua anăn yơh bruă gang mkhư̆ klei ruă tưp Covid-19 tuôm hŏng lu klei dleh dlan. Mñă čar Bình Dương dôk mâo hruê mmông yuôm, Khua lăn čar mtă kơ čar Bình Dương lŏ hyuă kjăp hĭn dŭm hdră êlan gang mkhư̆ klei ruă tưp, boh nĭk mâo đa đa anôk bruă, knơ̆ng bruă ka ngă jăk ôh hdră mtrŭn mrô 15, 16 mơ̆ng Khua knŭk kna, mơ̆ng năn dưi bi hrŏ ênoh mnuih mâo klei ruă tưp leh anăn amâo truh klei êgao hnơ̆ng ti sang êa drao. Khua lăn čar lŏ mtă, êjai ngă klei čuăl krĭng, bi kbưi yang ƀuôn, čar Bình Dương amâo dưi lui mnuih ƀuôn sang ư̆ êpa, êngoh duam, amâo mâo mnuih răng kriê, ba yua klei dưi mơ̆ng knŭk kna, alŭ wăl leh anăn phung mâo ai tiê kmah čiăng hrăm mbĭt đru kơ dŭm alŭ wăl dôk mâo klei dleh dlan.

Y Ƀel pô mblang