VOV4.Êđê- Aguah mbrue (26/7), ti anôk bi kƀĭn tal sa bruă kƀĭn ala gưl 15, hŏng boh tŭ dưn ênŭm 100% phung bi ala tŭ ư, Nguyễn Xuân Phúc, Khua hlăm phŭn bruă kđi čar gưl 13, pô bi ala Bruă kƀĭn ala gưl 15 klă klơ̆ng đĭ păn bruă jing khua lăn čar Việt Nam yang ƀuôn ngă phŭn êngiê wưng păn bruă 2021 – 2026. leh bi êdah boh tŭ dưn klei mplĕ hră, Khua lăn čar Nguyễn Xuân Phúc ngă mtam klei ƀuăn rơ̆ng đĭ păn bruă.

Blŭ hrăm ti mmông đĭ păn bruă, Nguyễn Xuân Phúc bi êdah klei lač jăk kơ bruă kƀĭn ala mâo klei đăo knang kơ ñu ruah ngă khua lăn čar, lač jăk kơ khua gĭt gai Đảng Nguyễn Phú Trọng lehanăn phung khua gĭt gai êlâo kơ dŭm klei đru mguôp leh prŏng prĭn kơ Đảng, kơ phung ƀuôn sang, lehanăn kơ lăn čar. Hŏng ya mta klei dôk găn khădah dleh dlan, amâodah găl ênưih, Khua lăn čar srăng păn kjăp lehanăn mđĭ hĭn klei thâo bi mguôp jih jang djuê ana, hrăm mbĭt hŏng djăp klei tŭ dưn hƀuê ênuk, knhuah dhar kreh, lehanăn klei yuôm bhăn kơ djuê ana, kyua klei đĭ kyar ktang, kluôm ênŭm, lehanăn kjăp kơ lăn čar drei./.

Pô mblang: Y-Khem Niê