VOV4.Êđê - Hlăm ai êwa hơ̆k mơak mơ̆ng hruê knăm mơak ala čar - jih jang mnuih ƀuôn sang nao ruah khua, aguah 23/5, Khua lăn čar Nguyễn Xuân Phu mbĭt hŏng mô̆ ñu leh anăn phung bi ala ti anôk mplĕ hră 041, anôk ruah khua mrô 9, wăl krah Củ Chi, kdriêk Củ Chi, ƀuôn prŏng Hồ Chí Minh mplĕ leh hră ruah phung bi ala Quốc hội gưl XV leh anăn phung bi ala HĐND dŭm gưl wưng thŭn 2021-2026.

Leh mplĕ hră, Khua čar Nguyễn Xuân Phúc wĭt lač klei êmuh mơ̆ng phung čih klei mrâo. Khua lăn čar mñă klă, klei bi hgŭm djuê ana jing bruă prŏng mơ̆ng Đảng, Awa Hồ khăp hơiêng mđing dlăng, gĭt gai leh anăn hlăm dŭm hruê mơak prŏng msĕ si Hruê mơak ala čar, jih jang mnuih ƀuôn sang nao mplĕ hră leh anăn dŭm bruă yuôm bhăn mkăn mơ̆ng ala čar. Boh nik, wăt hlăk êjai ala čar dôk tuôm hŏng klei yan adiê ngă, êa lip, klei bi hgŭm djuê ana dưi mđĭ lar nanao. Anei ăt jing knhuah gru yuôm bhăn djuê ana Việt Nam. Ai tiê anăn amâo mdei dưi mđĭ lu blư̆ leh anăn mđĭ lar ktang mơ̆ng ênuk bi blah truh kơ ênuk mkŏ mjing mđĭ kyar ala čar.

H’ Zawut pô mblang