VOV4.Êđê- Aguah mbruê (13/7), ti sang bruă khua lăn čar, khua lăn čar Nguyễn Xuân Phúc tŭ drông leh dŭm čô khua bi ala mơ̆ng dŭm ala čar Thailand, Chile, ala čar Nga ba mdah hră hriê mă bruă jing pô bi ala ti ala čar Việt Nam. Tŭ drông pô bi ala mơ̆ng ala čar Nga ti Việt Nam Gennady Bezdetko bi êdah hră mă bruă, khua lăn čar Nguyễn Xuân Phúc mñă klă, Việt Nam dlăng yuôn bhăn na nao klei bi mguôp kluôm ênŭm hŏng ala čar Nga, yap jing sa hlăm dŭm ala čar bi mguôp tal êlâo hĭn hlăm hdră êlan hŏng tač êngao mơ̆ng pô, lŏ hmăng hmưi bi mguôp hĭn hŏng ala čar Nga hlăm djăp bruă. khua lăn čar yap yuôm bhăn ala čar Nga kyua dŭm thŭn leh êgao mâo bruă kđĭ čar, bruă duh mkra ala ƀuôn hơĭt kjăp lehanăn đi kyar, jing ala čar mâo k’hưm hlăm bruă mgaih msir dŭm boh klei hlăm alŭ wăl lehanăn tar rŏng lăn. Pô bi ala mơ̆ng ala čar Nga mñă klă, Việt Nam jing ala čar bi mguôp tal êlâo hĭn hŏng ala čar Nga amâo knŏng djŏ ti alŭ wăl ngŏ dhung Asi ƀiădah hlăm tar alŭ wăl Asi - Pacific. Pô bi ala mơ̆ng ala čar Nga bi klă srăng mâo klei gĭr mtrŭt mjhar klei jĕ giăm 2 ala čar.

Pô mblang: Y-Ƀel Êban