VOV4.Êđê -  Tlam mbruê 29/6, ti sang bruă khua lăn čar, khua lăn čar Nguyễn Xuân Phúc tŭ drông leh aduôn Victoria Kwakwa, k’iăng khuă kiă kriê knơ̆ng bruă ngăn prăk tar rŏng lăn (WB) mâo bruă klam tĭ krĭng Ngŏ Asi lehanăn Pacific, dôk mâo klei hriê čuă lehanăn mă bruă ti ala čar Việt Nam. Mâo klei hơ̆k mơak leh lŏ bi tuôm hŏng aduôn Victoria Kwakwa, jing sa čô ƀĭng hgŭm jăk hŏng mnuih ƀuôn sang Việt Nam, khua lăn čar Nguyễn Xuân Phúc mñă klă, aduôn Victoria Kwakwa jing pô mâo klei đru prŏng êdi hlăm dŭm bruă mtrŭt mhjar hdră êlan bi mguôp pla wah WB lehanăn Việt Nam. Khua lăn čar lŏ brei thâo, ala čar Việt Nam dôk ngă mâo boh tŭ dưn dŭm hdră êlan, hdră mkăp bi mguôp hŏng WB. Aduôn Victoria Kwakwa ăt lŏ mâo klei hơêč hmưi kơ ala čar Việt Nam kyua dưi ksiêm dlăng kjăp klei ruă tưp Covid-19, lŏ mñă srăng đru kơ ala čar Việt Nam kơ djăp bruă hlăm klei blei vaccine đru kơ bruă gang mkhư̆ klei ruă tưp Covid-19, kriê dlăng klei suaih pral mnuih ƀuôn sang. Bơ̆k bâo kơ hdră êlan mđĭ kyar bruă duh mkra - ala ƀuôn, aduôn Victoria Kwakwa lač, Việt Nam čiăng mâo klei uêñ mĭn bi hrŏ bruă bi êran pui kmlă hŏng hdăng, mđĭ hĭn bruă mkra mjing pui kmlă doh.

Y Ƀel pô mblang