VOV4.Êđê - Hruê mbruê 23/6, ti adŭ bruă khua lăn čar, khua lăn čar Nguyễn Xuân Phúc tŭ drông leh khua phŭn bruă hŏng tač êngao Hàn Quốc Chung Eui Yong hlăm klei nao čuă klă klơ̆ng ala čar Việt Nam mơ̆ng hruê 21-23/6/2021. Hlăm klei tŭ drông anăn, khua lăn čar Nguyễn Xuân Phúc mñă klă klei mđĭ bruă bi mguôp 2 ala čar jing klei gĭr mbĭt, mơ̆ng gưl dlông truh kơ dŭm phŭn, dhar bruă, mnuih ƀuôn sang Việt Nam.

Khua lăn čar Nguyễn Xuân Phúc čang hmăng kơ khua phŭn bruă hŏng tač êngao lehanăn dŭm phŭn dhar bruă 2 ala čar mâo klei bi mguôp kjăp lehanăn mtrŭt mjhar hĭn klei mjĕ giăm gưl dlông lehanăn dŭm gưl bruă, hrăm mbĭt mâo klei kčĕ čiăng dưi găn klei dleh dlan kyua klei ruă tưp. Pŏk mlar boh prŏng lehanăn mâo lŭ hĭn bruă knuă duh bi liê mơ̆ng Hàn Quốc ti ala čar Việt Nam. Bi kơ dŭm boh klei hlăm alŭ wăl, tar rŏng lăn, khua phŭn bruă hŏng tač êngao Chung Eui Yong bi klă srăng mprăp kơ dŭm klei bi mguôp hŏng Việt Nam hlăm dŭm klei bi trông lu ala čar lehanăn dŭm boh klei jih 2 tĭng mâo sơăi klei uêñ mĭn, hmăng hmưi Việt Nam lŏ đru mguôp lehanăn mtrŭt mjhar klei blŭ hrăm lehanăn klei bi mguôp ti kjhôč ksĭ Triều Tiên.