VOV4.Êđê- Tlam mbruê 21/6, ti adŭ bruă khua lăn čar, khua lăn čar Nguyễn Xuân Phúc tŭ drông leh khua phŭng bruă hŏng tač êngao Singapore Vivian Balakrishnan hlăk mâo klei hruê čuă čhưn ala Việt Nam mơ̆ng hruê 20-23/6. Hlăm klei tŭ drông, khua lăn čar Nguyễn Xuân Phúc čih yap klei yuôm bhăn hlăm klei jĕ giăm, bi mguôp 2 ala čar Việt Nam lehanăn Singapore dôk ƀrư̆ hruê ƀrư̆ prŏng hĭn lehanăn tŭ dưn hĭn.

Singapore jing sa hlăm dŭm ƀĭng hgŭm duh bi liê tal êlâo hŏng ala čar Việt Nam. Boh nĭk, mơ̆ng akŏ thŭn 2020 truh kơ ară anei jing ala čar tal sa hlăm 70 ala čar lehanăn alŭ wăl duh bi liê kơ ala čar Việt Nam. Dŭm anôk bruă tuh tia Việt Nam - Singapore dưi đru mâo klei đĭ kyar bruă duh mkra - ala ƀuôn klă sĭt ti ala čar Việt Nam. Bi kơ dŭm boh klei ti krĭng êa ksĭ Ngŏ, khua phŭn bruă hŏng tač êngao Singapore mñă klă, yap yuôm bhăn bruă rơ̆ng kơ klei êđăp ênang, hơĭt kjăp, êngiê bruă mnia mblei lehanăn bruă êdeh phiơr ti krĭng êa ksĭ Ngŏ, ngă djŏ tui si klei bhiăn, hlăm anăn mâo klei kuôl kă klei bhiăn hlăm êa ksĭ thŭn 1982.

Pô mblang: Y-Khem Niê