VOV4.Êđê - Kbiă hriê mơ̆ng klei khăp kơ Awa Hồ, hlăm dŭm alŭ, ƀuôn mơ̆ng mnuih Xơdang čar Kon Tum, bruă tui hriăm leh anăn tui ngă tui si klei bi hmô jăk mơ̆ng Awa Hồ dưi čŏng ngă mơ̆ng mnuih ƀuôn sang. Khua mduôn A Ƀơ, khua bruă Đảng ƀuôn Tua Tem, să Đăk Glong, kdriêk Đăk Hà, čar Kon Tum, jing sa čô mâo klei bi hmô hlăm bruă tui hriăm leh anăn ngă tui si Awa Hồ krĭng mnuih djuê ƀiă čar Kon Tum.

Dŭm hruê knhal jih mlan 8, klei ruă Covid 19 ti dŭm čar kwar Dhŭng dôk mâo dleh dưi ksiêm dlăng, ti čar Kon Tum mâo leh dŭm pluh čô wĭt mơ̆ng krĭng dôk mâo klei ruă djŏ kman SARS-CoV-2. Ti anăp klei huĭ klei ruă anei srăng tưp lar hlăm êpul êya yang ƀuôn, Khua mduôn A Bơ, Khua bruă Đảng ƀuôn Tua Tem, să Đăk Long, kdriêk Đăk Hà kreh nao truh kơ grăp gŏ sang mtô mblang, ktrâo lač kơ mnuih ƀuôn sang hluê ngă hdră bi mdoh wăl hdĭp mda, ba yua êa rao bi mdjiê kman, truă čhiăm guôm ƀô̆ grăp blư̆ kbiă ti tač lehanăn hưn mthâo klă klei suaih pral tơdah mâo anak čô amâo dah găp djuê wĭt mơ̆ng krĭng mâo klei ruă. Grăp boh blŭ A Bơ lač, mnuih ƀuôn sang ƀuôn Tua Tem hdơr lehanăn čŏng pô hluê ngă. Tơdah dưi êmuh klei thâo kơ hdră mtô mblang, mtrŭt mjhar ba wĭt klei tŭ dưn. Khua mduôn A Bơ hơ̆k m’ak lač, amâo mâo klei thâo ôh, pô mđing dlăng kơ êpul êya yang ƀuôn snăn mnuih ƀuôn sang thâo săng mơh kơ ai tiê pô. “Kâo jĕ giăm hŏng mnuih ƀuôn sang nao truh kơ grăp gŏ sang čiăng mtô mblang kơ mnuih ƀuôn sang boh nik kơ hdră mĭn, hdră ngă čiăng mđĭ kyar bruă duh mkra ƀrư̆ hruê ƀrư̆ đĭ kyar kjăp ktang hĭn. Kơ klei bi hgŭm mguôp hlăm krĭng mnuih ƀuôn sang, kơ klei hriăm hră m’ar anak aneh pô amâo dưi kƀah ôh. Bruă mkŏ mjing knhuah hdĭp dhar kreh hlăm ƀuôn si srăng ngă čiăng kơ mnuih ƀuôn sang thâo ngă, thâo rông mnơ̆ng, pla mjing mđĭ kyar bruă duh mkra lehanăn hriăm hră m’ar ƀrư̆ hruê ƀrư̆ đĭ kyar hĭn.

Thŭn anei khădah truh leh 70 thŭn ƀiădah khua mduôn, Khua bruă Đảng A Bơ ăt grăp hruê nao truh kơ ƀuôn anei ƀuôn adih. Hŏng ai tiê đua klam, jih ai tiê kơ bruă snăn klei thâo mơ̆ng sa čô mnuih tuôm jing nai mtô lehanăn mă bruă kriê dlăng sang hră ăt đru lu mơh kơ ñu. Mâo hdră thâo mtô bi hriăm mbĭt hŏng klei thâo mtô mblang jăk, dŭm hdră êlan mtrŭn mơ̆ng Đảng, hdră bhiăn mơ̆ng knŭk kna, mơ̆ng bruă sang čư̆ êa dŭm gưl truh kơ A Bơ mâo leh ñu mblang pral ênưih thâo săng lehanăn jĕ giăm hŏng mnuih ƀuôn sang. Klă klơ̆ng msĕ si bruă hluê ngă hdră mđĭ kyar Đảng hlăm krĭng mnuih ƀuôn sang hluê đăo, Anôk bruă Đảng ƀuôn Tua Tem mâo khua mduôn ngă khua bruă Đảng mâo 11 čô Đảng viên snăn mâo truh 10 čô Đảng viên hluê đăo. Hlăm bruă hluê ngă Asăp mtrŭn mrô 05 mơ̆ng Phŭn bruă kđi čar “Kơ bruă tui hriăm lehanăn hluê ngă klei mĭn, knhuah hdĭp lehanăn knhuah mă bruă mngač Hồ Chí Minh”, Anôk bruă Đảng ƀuôn Tua Tem ba akŏ nanao hlăm ênoh 9 anôk bruă Đảng hlăm bruă Đảng să, Khua bruă Đảng să Đăk Long Trần Ngọc Trực, brei thâo: “Bruă Đảng mkă tĭng anôk bruă Đảng anei pŏk hluê ngă Hdră mtrŭn mrô 05 jăk êdi. Kơ hdră pŏk ngă truh kơ dŭm čô Đảng viên. Mâo dŭm gru hmô, hdră ngă bruă jăk, tŭ dưn. Đảng viên, mnuih ƀuôn sang hluê ngă jăk mơh. Ksiêm wĭt 5 thŭn hluê ngă Asăp mtrŭn mrô 05, bruă Đảng lehanăn A Bơ pô mâo leh bruă Đảng să hưn mthâo, ba mdah hŏng Anôk dlăng bruă Đảng kdriêk ksiêm dlăng pah brei Hră pah mni kơ êpul êya lehanăn mnuih mơ̆ng Anôk bruă anei hluê ngă jăk Asăp mtrŭn mrô 05”.

Mđĭ lar bruă klam mơ̆ng pô, khua mduôn, Khua bruă Đảng ƀuôn Tua Tem A Bơ mâo leh lu klei đru mguôp kơ hdră mđĭ kyar kluôm mơ̆ng ƀuôn lehanăn mơ̆ng să Đăk Long. Sui hŏng anei 7 thŭn wưng să Đăk Long mâo mkŏ mjing, ênoh gŏ êsei ƀun truh êbeh 75%. Ară anei, ênoh anei trŭn dôk 37,2%. Hlăm hdră mđĭ kyar mkra mđĭ klei hdĭp, khua mduôn A Bơ ba akŏ hlăm djăp bruă, kah mbha klei thâo, ktrâo lač kơ mnuih ƀuôn sang hdră pla, dlăng kriê wiê ênăk ana kphê, ksu, gang mkhư̆ klei ruă kơ kbao êmô, mđĭ kyar êpul ŭn bi mdjuê hŏng ŭn dliê... A Sự, Khua anôk bruă mặt trận čar kwar Việt Nam să Đăk Longn brei thâo, ƀuôn Tua Tem mâo 125 gŏ êsei mnuih djuê ana Sedang, khua mduôn A Bơ jing pô ba akŏ mđĭ lar ai tiê bi hgŭm mguôp, iêu jak mnuih ƀuôn sang, jing gru mngač kơ gŏ sang lehanăn êpul êya. “Khua mduôn A Bơ jing mnuih jih ai tiê kơ bruă lehanăn Khua mduôn hdĭp jing sa gru mngač kơ anak čô hlăm sang lehanăn kơ jih ƀuôn. Grăp blư̆ bi kƀĭn ƀuôn, khua mduôn A Bơ lač, mnuih ƀuôn sang mđing hmư̆ êdi.

Mbĭt hŏng klei hdĭp mnuih ƀuôn sang ƀrư̆ hruê dưi mkra mđĭ, hlăm dŭm thŭn giăm anei ti să Đăk Long, kdriêk Đăk Hà, čar Kon Tum, kyua mâo phung ba akŏ msĕ si khua mduôn A Bơ, lu boh tŭ yuôm dhar kreh jăk siam mơ̆ng mnuih djuê ana Sedang dưi djă pioh lehanăn mđĭ lar. Să Đăk Long mâo 5 ƀuôn jih jang snăn jih 5 ƀuôn anei mâo mdơ̆ng leh s’aĭ Sang Roong djŏ knhuah bhiăn mơ̆ng mnuih djuê ana Sedang ngă anôk bi mjĕ mjuk, hriăm hrăm bi kƀĭn êpul êya. Dŭm êpul tông čing čhar, kdŏ čhuang dưi krơ̆ng kjăp lehanăn mtô lŏ čuê kơ ênuk gưl mrâo. Dŭm mta bruă hŏng kiê kngan mơ̆ng đưm, msĕ si hrĭ mñam, pơ̆k mñam... dôk pŏk lu klei găl kơ mnuih djuê ana Sedang tinei mđĭ kyar bruă duh mkra gŏ sang./.