VOV4.Êđê - Thŭn anei êbeh 80 thŭn leh ƀiădah Khua mduôn Y Yơh Kƀuôr (Aê Huy) ti ƀuôn prŏng Ƀuôn Ama Thuôt, čar Dak Lak ăt jih ai tiê hŏng bruă hlăm ƀuôn. Dưi đaŏ knang khua mduôn, Khua adŭ bruă mặt trận, Khua êpul hgŭm khua mduôn hlăm lu thŭn, ñu gĭr hŏng djăp mtă bruă. Hlăm dŭm hruê êgao, ñu ăt jing sa čô jih ai tiê hŏng êpul hgŭm mkăn nao grăp boh sang hâo hưn, iêu jak mnuih ƀuôn sang hluê ngă hdră gang mkhư̆ klei ruă tưp leh anăn mguôp hlăm keh gang mkhư̆ klei ruă tưp ti alŭ wăl.

Mơ̆ng leh bluh mâo klei ruă Covid 19 tal 4 ti Dak Lak, grăp mmăt, khua mduôn Y Yơh Kƀuôr kreh iêu Aê Huy, ti ƀuôn Kmrơ̆ng Prŏng A, să Êa Tu, ƀuôn prŏng Ƀuôn Ama Thuôt, lŏ dôk mbĭt hŏng phung khua alŭ nao truh kơ grăp boh sang hlăm ƀuôn čiăng mtrŭt mnuih ƀuôn sang hluê ngă kjăp dŭm klei kčah mtrŭn gang mkhư̆ klei ruă tưp, mtă kơ gŏ sang mâo anak aneh găp djuê wĭt mơ̆ng krĭng mkăn bi nao hưn mdah klei suaih pral lehanăn čŏng bi ktlah ti sang. Aduôn H’Ŏ Kƀuôr, mnuih ƀuôn sang ti ƀuôn Kmrơ̆ng Prŏng A, să Êa Tu, ƀuôn prŏng Ƀuôn Ama Thuôt brei thâo, hmư̆ klei hâo hưn hlăm đĭng mmuñ, hră klei mrâo lehanăn dŭm mmông dôk blŭ hrăm hŏng Khua mduôn Aê Huy, gŏ sang ñu mâo leh klei thâo hĭn hlăm hdră gang mkhư̆ klei ruă tưp. Khădah klei hdĭp mda amâo djŏ jing mdrŏng sah ôh, ƀiădah ai tiê jing yuôm hĭn, ñu ăt đru mguôp hlăm keh gang mkhư̆ klei ruă Covid 19 mơ̆ng knŭk kna:“Kâo krah hmư̆ klei hâo hưn kơ klei ruă tưp lehanăn hdră gang mkhư̆ klei ruă tưp, hlăm gŏ sang kâo ăt hluê ngă kjăp mơh. Leh mâo dŭm blư̆ mtrŭt mjhar đru mguôp snăn kâo ăt sa ai đru mbĭt, mâo ƀiă mguôp ƀiă, mâo lu mguôp lu, tui si klei mâo pô yơh”.

Ƀuôn Kmrơ̆ng Prŏng A ară anei mâo giăm 500 gŏ êsei hŏng 2.200 čô mnuih, lu jing mnuih djuê ana Êđê. Khua mduôn jing gru mngač ba akŏ, anôk kriê dlăng ƀuôn ngă bruă jih ai tiê kyua anăn dŭm hdră duh mkra, kriê kjăp knhuah dhar kreh mâo lu mnuih ƀuôn sang mđing truh. Kyua anăn, truh kơ ară anei, ƀuôn ăt dôk kriê pioh kjăp dŭm boh čing yuôm, čeh đưm, gru grua boh đêč mnơ̆ng pơ̆k mñam, kdrăp čŭt h’ô djuê ana mơ̆ng đưm, pin êa, sang dlông. Grăp blư̆ ƀuôn sang mâo klei amâo thâo bi djŏ, bi keh koh, grăp čô lŏ dôk ksiêm dlăng ti klei djŏ, klei soh, ƀiădah ba hưn mthâo kơ anôk bruă djŏ tuôm mơ̆ng hdră bhiăn knŭk kna. Khua mduôn Aê Huy hơ̆k kdơ̆k lač, khădah hmăi mơ̆ng wăl kreh dhar ƀuôn prŏng ƀiădah ƀuôn Kmrơ̆ng prŏng A ăt jing ƀuôn sang mnuih Êđê jiă knhuah dhar kreh djuê ana:“Grăp čô mnuih ƀuôn sang, phung êdam êra hđeh êlăk hlăm ƀuôn mâo leh klei sa ai, hluê ngă jăk hdră bhiăn kyua anăn hmei m’ak snăk. Tal dua, jing hdră kriê pioh klei bhiăn đưm, knăm m’ak djuê ana, klei ngă yang akâo klei suaih pral, ngă yang akŏ pin êa snăn jih jang hmei, khua ƀuôn, dŭm êpul êya bruă hrăm mbĭt bi hgŭm, mtă mtăn kơ mnuih ƀuôn sang hlăm ƀuôn djă pioh lehanăn răng mgang.

Mơ̆ng leh mâo hdră mtrŭn mơ̆ng Anôk bruă sang čư̆ êa ƀuôn prŏng Ƀuôn Ama Thuôt lehanăn să Êa Tu đru kơ prăk mkra êlan, ƀuôn Kmrơ̆ng Prŏng A mkŏ mjing leh Klei bi kƀĭn jih jang mnuih ƀuôn sang lehanăn grăp êpul mdê mdê čiăng bi trông čhai, đru mguôp prăk kăk, hdră hluê ngă, ksiêm dlăng. Hŏng dŭm gŏ êsei ka thâo săng klă nik, khua mduôn Aê Huy hrăm mbĭt hŏng dŭm gưl bruă Đảng, anôk bruă čŏng kriê dlăng, dŭm êpul êya nao truh kơ grăp blŭ wăl mtô mblang, mtrŭt mjhar, hưn lač klă klei tŭ mơ̆ng bruă mkra êlan mbĭt anăn hnêč dŭm mmông nao hlăm knăm m’ak, klei bi kuôl ung mô̆ hlăm ƀuôn sang lŏ mblang kơ jih jang ƀuôn sang thâo klă hĭn. Hŏng klei mtô mblang klă nik, jăk ênang, khua mduôn mđĭ ai, mjing leh klei sa ai hlăm mnuih ƀuôn sang. Êngao kơ hdră đru 200 êbâo prăk/gŏ êsei, grăp gŏ êsei lŏ đru thiăm 40 êbâo prăk kơ 1met lăn mgăn hluê ƀô̆ êlan. Mbĭt anăn, mnuih ƀuôn sang lŏ mbĕ mnư̆, koh ana kyâo čiăng pŏk êlan găn êrô mâo 6m truh kơ 8m hluê hnơ̆ng čuăn mkŏ mkra krĭng ƀuôn sang mrâo. Mơ̆ng anăn, knŏng sa wưng bhiâo, dŭm kdrêč êlan hlăm ƀuôn dưi mkra hŏng betông, gu drŏng leh s'aĭ.

Bùi Văn Hượng, knuă druh bruă dhar kreh să Êa Tu, ƀuôn prŏng Ƀuôn Ama Thuôt brei thâo, hŏng klei kreh kriăng, jih ai tiê kơ bruă, klei đua klam, thâo săng kơ klei bhiăn djuê ana, khua mduôn Aê Huy jing leh anôk đăo knang kjăp kơ ai tiê klei mĭn mơ̆ng mnuih ƀuôn sang ƀuôn Kmrơ̆ng Prŏng A. Klei đru mguôp mơ̆ng khua mduôn đru leh kơ ƀuôn krơ̆ng kjăp anăn knăl jing ƀuôn dhar kreh hlăm lu thŭn êgao lehanăn ngă leh nanao hnơ̆ng čuăn mkŏ mkra krĭng ƀuôn sang mrâo. Hŏng êbeh 30 thŭn ngă bruă mặt trận, păn ngă Khua êpul hgŭm phung khua mduôn să hlăm lu thŭn, khădah păn ya bruă, ñu ăt bi hgŭm kjăp hŏng phung knuă druh nah gŭ, êpul bruă, êpul êya hlăm ƀuôn čiăng bi leh bruă pô, mđĭ lar klei đua klam mơ̆ng pô hlăm bruă bi mguôp mnuih ƀuôn sang, ba akŏ hlăm dŭm mta bruă. Ñu ăt jing gru mngač êdah êdi hlăm bruă kriê kjăp knhuah dhar kreh, rông anak čô. Ñu kreh lač, tơdah lač hlŏng ngă mtam yơh, kyua anăn ñu mâo mnuih ƀuôn sang mpŭ lehanăn đăo knang. Boh nik, leh păn ngă Khua êpul hgŭm phung khua mduôn, ñu mđĭ lar leh bruă klam mơ̆ng grăp čô hlăm êpul hgŭm lehanăn mnuih ƀuôn sang ti dŭm ƀuôn: Êpul hgŭm phung khua mduôn ăt mtă kơ phung khua mduôn gĭr mtô mblang, mtrŭt mjhar phung khua mduôn mkăn hluê ngă kjăp bruă kriê dlăng, mtă mtăn kơ anak čô amâo duah hluê klei amâo djŏ, klei jŭ jhat hlăm yang ƀuôn lehanăn hluê ngă kjăp hdră gang mkhư̆ Covid 19. Êpul hgŭm phung khua mduôn ăt nao hgŭm hlăm hdră kriê pioh knhuah dhar kreh mơ̆ng djuê ana pô, mjuăt bi hriăm anak aneh hluê ngă jăk bruă klam, amâo ngă soh hŏng klei bhiăn knŭk kna.

Bi mguôp sĭt suôr hŏng mnuih ƀuôn sang lehanăn thâo săng klei mĭn mơ̆ng mnuih ƀuôn sang, êbeh 20 thŭn êgao, khua mduôn Aê Huy jing leh “Pô phŭn kơ klei bi mguôp” mơ̆ng ƀuôn Kmrơ̆ng Prŏng A lehanăn mơ̆ng să Êa Tu. Hŏng hdră ngă bruă “Nao truh kơ grăp alŭ, ƀuôn; khŏk ƀăng grăp boh sang”, mtă mtăn hŏng klei jăk ênang, khua mduôn mâo leh mnuih ƀuôn sang đăo knang, tui hmư̆ klei mtô mtă. Mơ̆ng anăn, đru mguôp sĭt êmĭt hlăm hdră mtrŭt mjhar mkŏ mkra klei hdĭp mrâo ti krĭng mnuih ƀuôn sang dôk, hyuă kjăp klei bi mguôp plah wah mnuih ƀuôn sang dŭm djuê ana hlăm ƀuôn./.