VOV4.Êđê- Mđing truh kơ 74 thŭn bi hdơr hruê kahan êka êkah, kahan êngiă asei (27/7), tlam mbruê 19/7, khua phŭn bruă mnuih mă bruă, kahan êka êkeh lehanăn yang ƀuôn Đào Ngọc Dung nao čuă lehanăn mđup brei mnơ̆ng dhơ̆ng kơ dŭm gŏ sang mâo klei đru ti Hà Nội. Khua phŭn bruă Đào Ngọc Dung mbĭt hŏng êpul ngă bruă nao đru lehanăn mđup brei mnơ̆ng dhơ̆ng kơ 3 gŏ sang mâo klei đru hlăm bruă Cách mạng jing: Gŏ sang Phạm Đình Thi, kahan êka 81%, gŏ sang aduôn Đỗ Thị Hạnh jing mô̆ pô êngiă asei Nguyễn Văn Thuyết dôk ti kdriêk čar Long Biên lehanăn gŏ sang Nguyễn Tường Vĩnh, kahan êka êkeh 81% ti kdriêk čar Ba Đình. Nao čuă dŭm gŏ sang anei, khua phŭn bruă mnuih mă bruă, kahan êka êkeh lehanăn yang ƀuôn Đào Ngọc Dung bi êdah klei hdơr knga kyua dŭm klei bi mguôp lehanăn klei luič liê mơ̆ng dŭm gŏ sang, hmăng hmưi kơ dŭm gŏ sang lŏ mâo klei gĭr bi lar knhuah gru cách mạng, gĭr dưi găn jih dŭm klei dleh dlan, jing gru hmô mngač kơ anak čô, mă bruă knuă lehanăn mkra mjing. Tui hluê anăn dưi mđĭ kyar ƀuôn sang, ala čar pô. 

Pô mblang: Y-Ƀel Êban