VOV4.Êđê - Hlue si asăp jak iêu mơ̆ng Đại tướng Phan Văn Giang, khua phŭn bruă lĭng kahan ala čar drei, Êpul khua kahan gưl dlông Êpul hgŭm ala mtao Angle lehanăn Dưr Ailen mâo Robert Ben Lobban Wallace, Khua phŭn bruă lĭng kahan ngă khua êpul, klă klơ̆ng hriê čhưn kơ Việt Nam mơ̆ng hrue 21 – 23/7/2021. Aguah mbrue (22/7), ti anôk bruă Phŭn bruă lĭng kahan, Đại tướng Phan Văn Giang, Khua phŭn bruă lĭng kahan kiă kriê leh klei drông lehanăn mâo leh klei bi blŭ hrăm hŏng Robert ben Lobban Wallace mbĭt hŏng phung khua êmua hlăm êpul.

Ti anôk bi blŭ hrăm, khua kahan prŏng ala mtao Angle lehanăn Dưr Ailen sa ai hŏng Việt Nam mghaih msir kơ boh klei hlăm êa ksĭ Ngŏ, bi klă klei yuôm bhăn kơ klei êngiê hlăm êlan êa ksĭ, êlan êdeh phiơr, sa ai hŏng klei thâo mpŭ kơ klei bhiăn, lŏ mñă jih jang klei amâo mâo thâo bi djŏ knŏng mghaih msir hŏng hdră êđăp ênang, tui si klei bhiăn tar rŏng lăn. Bi tŭ ư bi klă kơ klei mjĕ mgiăm hgŭm mbĭt plah wah dua ala čar mâo mđĭ leh hlăm sa knhuang mrâo, hŏng lu boh tŭ dưn mơ̆ng djăp bruă kđi čar, bruă duh mkra mnia mblei, dhar kreh mjuăt bi hriăm./.

Y Khem pô mblang