VOV4.Êđê - Tŭ ư klei iêu jak mơ̆ng Đại tướng Phan Văn Giang, khua phŭn bruă lĭng kahan Việt Nam, Lloyd Austin, khua phŭn bruă lĭng kahan Mi mâo leh klei hriê čuă čhưn ala čar Việt Nam mơ̆ng hruê 28-29/7. Tui si pô blŭ bi ala mơ̆ng phŭn bruă hŏng tač êngao Việt Nam, aduôn Lê Thị Thu Hằng, klei hriê čuă čhưn ala čar Việt Nam mơ̆ng khua phŭn bruă lĭng kahan Mi dưi lŏ đru bi mđĭ klei jĕ giăm, klei đăo knang plah wah mnuih ƀuôn sang lehanăn lĭng kahan 2 ala čar, ngă dŭm mta phŭn hlăm klei bi mguôp bruă lĭng kahan dưi bi klă leh plah wah 2 phŭn bruă lĭng kahan lehanăn klei kuôl kă mơ̆ng dŭm čô khua êmua 2 ala čar, đru hlăm klei bi mguôp kluôm ênŭm Việt Nam - Mi. Êlâo kơ khua phŭn bruă lĭng kahan Mi Lloyd Austin truh kơ Việt Nam, Mi ba jao leh 3 êklăk hnơ̆ng vaccine Moderna kơ Việt Nam hlăm hdră COVAX. Lloyd Austin, 67 thŭn, jing sa čô khua mâo 4 mtŭ hlăm lĭng kahan Mi, jing sa čô khua phŭn bruă lĭng kahan klĭt jŭ tal êlâo hĭn ti ala čar Mi. Ñu đĭ păn bruă hlăk hruê 22/1/2021, êdei kơ 2 hruê leh khua mil čhil MI Joe BIden Mi đĭ păn bruă.

Y Ƀel pô mblang