VOV4.Êđê- Aguah 11/11, Hluê si Hdră klei bi kƀĭn, leh mjưh ruê̆ bruă kơ mnuih mă bruă, kahan ka êkeh leh anăn ala ƀuôn hlăm Klei bi kƀĭn tal 2 Bruă kƀĭn ala lŏ dơ̆ng boh phŭn êmuh leh anăn wĭt lač klei êmuh hŏng Khua phŭn bruă sang hră mtô bi hriăm. Dŭm boh phŭn phung bi ala Bruă kƀĭn ala mđing, êmuh Khua phŭn bruă sang hră mtô bi hriăm Nguyễn Kim Sơn kƀĭn hlăm dŭm bruă ala ƀuôn dôk mđing ară anei anăn jing: Hnơ̆ng mtô leh anăn hriăm online, hnơ̆ng čih mkra hră mtô bi hriăm hluê si hdră bi hriăm mrâo, mtô thiăm, mtô thiăm online. Wĭt lač boh phŭn anei, Khua phŭn bruă Nguyễn Kim Sơn brei thâo, bruă mtô leh anăn hriăm online jih mông msĕ si ară anei ka tuôm mâo ôh anăn mâo lu klei dleh dlan. Hluê si klei ksiêm yap amâo djŏ 1 êklăk 5 êtuh êbâo čô hđeh sang hră ôh ƀiădah boh sĭt 1 êklăk 8 êtuh čô hđeh sang hră ară anei amâo mâo ôh kdrăp pioh hriăm online. Khădah, ară anei bruă sang hră - mtô bi hriăm dôk gĭr čiăng rơ̆ng hnơ̆ng jăk mtô leh anăn hriăm bi knar plah wah dŭm hdră. Khua phŭn bruă Nguyễn Kim Sơn čih yap klei blŭ mgyôp mơ̆ng phung bi ala leh anăn ƀuăn rơ̆ng srăng mâo klei gĭt gai klă klơ̆ng hlăm wưng kơ anăp.

Pô mblang: H’Zawut Ƀuôn Yă