VOV4.Êđê - Tlam mbruê 28/6, êpul bi ala gưl dlông klei êđăp ênang Việt Nam mơ̆ng Đại tướng Tô Lâm, khua phŭn bruă kahan ksiêm ngă khua êpul, nao hgŭm leh klei bi kƀĭn đru kčĕ bruă khua êmua gưl dlông mơ̆ng êpul hgŭm dŭm ala čar Ngŏ dhŭng Asi (ASEAN) - Nga tal êlâo hĭn hŏng êlan online. Blŭ hlăm klei kƀĭn trông anăn, khua phŭn bruă Tô Lâm mñă klă, anei jing bruă ngă yuôm bhăn êdi, čiăng mtrŭt mjhar klei jĕ giăm, bi mguôp dŭm hdră êlan ASEAN - Nga. Bi klă srăng mđĭ hĭn bruă klam čiăng dưi ba klei kčĕ anei jing kluôm ênŭm lehanăn klă klơ̆ng hĭn, mprăk kơ klei bi mguôp, kah mbha klei thâo hŏng dŭm ala čar ASEAN lehanăn Nga, čiăng hrăm mbĭt mgaih msir dŭm boh klei mbĭt. Khua phŭn bruă Tô Lâm lač, hruê mmông kơ anăp, dŭm ala čar, alŭ wăl lŏ bi mđĭ dŭm bruă ngă bi kjăp klei đăo knang, mkŏ mjing dŭm êlan blŭ hrăm mâo boh tŭ dưn čiăng bi trông dŭm klei kčĕ, hmao mgaih msir dŭm klei amâo thâo bi djŏ. Mtrŭt mjhar bruă bi mguôp grăp tĭng mâo klei jăk, mđĭ kyar bruă duh mkra ala ƀuôn kjăp ktang. Hlăm klei bi trông, dŭm čô bi ala, ksiêm êmuh leh kơ dŭm hdră êlan čiăng rơ̆ng klei hơĭt kjăp bruă kđi čar, mâo klei êđăp ênang hlăm alŭ wăl ASEAN lehanăn prŏng hĭn jing alŭ wăl Asi - Pacifĭk.

Y Ƀel pô mblang