-

VOV4.Êđê- Hruê 9/6, Phạm S – k’iăng khua anôk bruă sang čư̆ êa čar Lâm Đồng nao ksiêm dlăng leh hdră gang mkhư̆ klei ruă Covid 19 ti alŭ wăl dŭm kdriêk Đức Trọng, Lâm Hà. Ti kdriêk Đức Trọng, êpul nao čuă, ksiêm dlăng leh anôk gak răng kñăm gang mkhư̆ klei ruă Covid 19 ti tač êdeh phiơr Liên Khương, wăl krah Liên Nghĩa lehanăn ti êlan dơ̆ng prŏng mrô 28 B, siă knông hŏng Bình Thuận (să Ninh Loan). Mơ̆ng hdră ksiêm dlăng, Phạm S čih yap lehanăn bi mni kơ dŭm êpul ti anôk gak răng ngă bruă hŏng jih ai tiê lehanăn mjing djăp klei găl ktrâo lač kơ mnuih ƀuôn sang nao hưn mdah klei suaih pral gang mkhư̆ klei ruă tưp Covid 19 tơdah găn anôk ksiêm dlăng. Ti Lâm Hà, hluê si klei hưn mơ̆ng phung khua kiă kriê kdriêk, hdră gang mkhư̆ klei ruă Covid 19 ti alŭ wăl kdriêk dưi hluê ngă kjăp hluê si hră m’ar gĭt gai mơ̆ng gưl dlông čar. Phạm S mtă kơ kdriêk Lâm Hà lŏ hluê ngă kjăp klei gĭt gai mơ̆ng gưl dlông, čar, hlăm anăn mâo dŭm mta mrâo kơ krĭng bi ktlah hluê asăp mtrŭn mrô 15 lehanăn krĭng bi ktlah hluê asăp mtrŭn mrô 16 mâo kdriêk, să mđing dlăng./.

Pô mblang: H’Nêč Êñuôl