VOV4.Êđê - K’iăng Khua Knŭk kna Trương Hoà Bình nao ksiêm dlăng leh anăn mă bruă hŏng bruă sang čư̆ êa dua kdriêk čar Gò Vấp leh anăn Bình Thạnh ti ƀuôn prŏng Hồ Chí Minh kơ hdră gang mkhư̆ klei ruă tưp ti alŭ wăl. Hlăm dŭm mmông mă bruă hŏng dua kdriêk čar Gò Vấp leh anăn Bình Thạnh, K’iăng Khua Knŭk kna mtă dŭm kdriêk čar brei mâo hdră kčah mprăp djăp kdrăp mnơ̆ng čiăng rơ̆ng 4 tinăn mtam sĭt mâo klei ruă tưo dleh ktuê dlăng. Mđĭ ktang kriê dlăng ti alŭ wăl, lŏ dơ̆ng mđĭ ktang hâo hưn mtô mblang kơ jih jang mnuih ƀuôn sang, boh nik hŏng dŭm anôk mkra mjing, dŭm wăl sang jưh mơ̆ng mnuih mă bruă, phung čhĭ mnơ̆ng điêt ngă jăk 5 klei mtă. K’iăng Khua Knŭk kna lač kơ dŭm alŭ wăl brei ngă bi jăk bruă bi hgŭm hlăm bruă hluê ngă, boh nik leh mâo êpul dưi mđĭ ktang čiăng đru gang mkhư̆ klei ruă tưp. Hluê si ñu, wtă tơdah êpul đru gang mkhư̆ klei ruă tưp mơ̆ng anôk mkăn ba nao amâodah êpul ti alŭ wăl snăn kdriêk čar brei pral kriê dlăng tliêr kjăp, bi tŭ ư, rơ̆ng amâo brei hmaĭ, ngă dleh dlan ôh kơ mnuih ƀuôn sang.

H Zawut pô mblang