VOV4.Êđê - Adŭ bruă Knŭk kna mâo leh hră m’ar hưn mthâo klei blŭ mơ̆ng K’iăng khua knŭk kna Lê Văn Thành kơ bruă mjing klei găl hlăm bruă dŭ mdiăng mnơ̆ng dhơ̆ng hlăm wưng dôk bluh mâo klei ruă Covid 19. Hluê anăn, K’iăng khua knŭk kna gĭt gai: Amâo ksiêm dlăng ôh ti anôk gak răng kñăm ksiêm dlăng klei ruă tưp hŏng êdeh êdâo mâo mta bi mklă QR Code dôk wưng kčah ba yua mâo Anôk bruă êlan klông dŭ mdiăng mkăp dŭ mdiăng mnơ̆ng dhơ̆ng yua hlăm bruă rŭ mdơ̆ng, mkra mjing, mnia mblei, ba chĭ lehanăn blei mơ̆ng ala tač êngao, mnơ̆ng blei yua aguah tlam (amâo tĭng ôh dŭm mta mnơ̆ng kăm hlăm bruă mkra mjing, mnia mblei djŏ si klei kčah mtrŭn) hlăm djăp êlan êran pral, êlan dơ̆ng prŏng čar, êlan kdriêk, êlan krĭng ƀuôn sang hlăm kluôm ala čar. Tơdah amâo mâo klei bi mklă QR Code amâo dah jih wưng kčah ba yua snăn brei hluê ngă hdră hưn mthâo klei suaih pral lehanăn mâo hră bi mklă amâo mâo ôh kman SARS-COV-2 hŏng mnuih đĭ hlăm êdeh. Ti dŭm krĭng mâo klei ruă tưp, dŭm alŭ wăl brei mâo hdră mbha grông êlan, mkŏ mjing hdră găn êrô djŏ guôp čiăng bi hrŏ tuič hnơ̆ng kdrăp êdeh êdâo nao mŭt hlăm ƀuôn prŏng kñăm gang mkhư̆ klei ruă tưp ƀiădah ăt rơ̆ng kjăp bruă dŭ mdiăng, găn êrô, kah mbha mnơ̆ng dhơ̆ng hlăm alŭ wăl./.

H Nêč pô mblang