VOV4.Êđê- Tlam hruê 24/8, K’iăng khua knŭk kna Lê Văn Thành mbĭt hŏng êpul ngă bruă nao mă leh bruă hŏng čar Long An kơ hdră gang mkhư̆ klei ruă Covid 19 lehanăn hdră mđĭ kyar bruă duh mkra ala ƀuôn ti alŭ wăl. Ti anôk mă bruă, K’iăng khua knŭk kna Lê Văn Thành lač snei, klei ruă tưp ti Long An dôk mâo dleh dưi ksiêm dlăng, khă snăn ênoh mnuih ruă dưi ksiêm dlăng lehanăn ăt dưi gang mkhư̆. Hlăm dŭm hruê ti anăp, brei hluê ngă kjăp hdră bi ktlah yang ƀuôn... boh nik brei mjêč pŏk hdră ksiêm mkă dlăng čiăng tui duah F0 hlăm kluôm čar kñăm gang mkhư̆ klei ruă anei đĭ lar. Knŏng ti dŭm krĭng bi ktlah, kwang dar brei rơ̆ng mâo djăp mnơ̆ng dhơ̆ng ƀơ̆ng huă kơ mnuih ƀuôn sang. Amâo djŏ knŏng dlăng anei jing hdră đru kơ yang ƀuôn ƀiădah anei jing hdră kñăm gang mkhư̆ klei ruă tưp. Kơ mnuih mă bruă gang mkhư̆ klei ruă tưp, hluê si K’iăng khua knŭk kna Lê Văn Thành, gưl dlông srăng mâo hdră đru klă klơ̆ng, pral kơ dŭm alŭ wăl. Khă snăn, Long An brei mprăp djăp ai dưi, klei mâo, mnuih ngă bruă, ba yua klei bhiăn djŏ guôp, mkăp ngăn prăk mđing kơ hdră gang mkhư̆ klei ruă tưp. Gĭr msưh kdŭn klei ruă tưp, hnưm lŏ krŭ wĭt bruă duh mkra pla mjing, mnia mblei./.

Pô mblang: H’Nêč Êñuôl