VOV4.Êđê- Tlam hruê 27/7, ti Hà Nội, Khua hlăm Phŭn bruă kđi čar, K’iăng khua knŭk kna Phạm Bình Minh nao leh ti Anôk bi kƀĭn mkăp mơ̆ng Klei bi kƀĭn gưl dlông Anôk bruă mnơ̆ng ƀơ̆ng huă 2021 (UNFSS) lehanăn mâo klei blŭ hrăm ti anôk bi trông čhai. Klei bi kƀĭn mâo mta kñăm tui duah hdră ngă bruă mrâo kñăm đru kơ hdră mkăp mnơ̆ng ƀơ̆ng huă, mtrŭt mđĭ dŭm hdră msir ngă bruă lehanăn klei bi hgŭm mơ̆ng anôk bruă đru brei, iêu mtrŭt djăp ai dưi klei mâo hlăm bruă duh bi liê knŭk kna lehanăn êngao knŭk kna čiăng hluê ngă bruă anei. Klei bi kƀĭn mkăp mơ̆ng Klei bi kƀĭn gưl dlông Anôk bruă mnơ̆ng ƀơ̆ng huă tar rŏng lăn mphŭn pŏk ti Anôk bruă Mnơ̆ng ƀơ̆ng huă lehanăn Mnơ̆ng bruă lŏ hma mơ̆ng Êpul hgŭm lu ala čar FAO ti ƀuôn prŏng phŭn Rome, Italy hluê hdră klă anăp bi mguôp hŏng online. Mkŏ mjing hlăm 3 hruê, mơ̆ng hruê 26-28/7, anei jing hdră mprăp kơ Klei bi kƀĭn gưl dlông klă sĭt, tĭng srăng mkŏ mjing ti Anôk bruă Êpul hgŭm lu ala čar ti New York, Mi hlăm mlan 9 ti anăp./.

Pô mblang: H’Nêč Êñuôl