VOV4.Êđê- Blŭ hrăm hlăm klei bi kƀĭn jao bruă online Anôk bruă gĭt gai gang mkhư̆ klei ruă Covid-19 ƀuôn prŏng Hồ Chí Minh hruê 2-7, K’iăng khua knŭk kna Trương Hòa Bình mtă kơ ƀuôn prŏng Hồ Chí Minh ktuê dlăng dŭm Hnơ̆ng kčah klei êđăp ênang gang mkhư̆ klei ruă Covid-19 hlăm jih bruă, krĭng wăl čiăng mđing hmư̆ leh anăn pŏk ngă tŭ dưn hlăm boh klei mrâo, gĭr ktưn truh knhal jih mlan 7/2021, klei ruă tưp hrŏ lu leh anăn truh mlan 8 thŭn 2021 dưi mkhư̆ klei ruă tưp. Hluê si K’iăng khua knŭk kna Trương Hòa Bình, dŭm kdriêk čar, kdriêk ti ƀuôn prŏng pral dlăng kơ boh klei ruă tưp ti alŭ wăl kriê dlăng čiăng mâo hdră bi ktlah yang ƀuôn bi djŏ guôp, ba yua Asăp mtrŭn mrô 10 mơ̆ng Knơ̆ng bruă sang čư̆ êa ƀuôn prŏng Hồ Chí Minh amâodah kčĕ ba yua Asăp mtrŭn mrô 16 mơ̆ng Khua Knŭk kna tơdah ƀuh klă sĭt čiăng êdi. Brei mđĭ lar bruă klam mơ̆ng Anôk bruă gĭt gai gang mkhư̆ klei ruă Covid-19 ti dŭm quận, kdriêk, Êpul gang mkhư̆ Covid-19 êpul êya mơ̆ng bruă ksiêm dlăng leh anăn msir mgaih phung ngă soh hŏng klei kčah mtrŭn gang mkhư̆ klei ruă tưp mơ̆ng ƀuôn prŏng.

Pô mblang: H’Zawut Ƀuôn Yă