VOV4.Êđê - Tlam mbruê 4-6, ti Anôk bruă knŭk kna, K’iăng Khua knŭk kna Vũ Đức Đam, Khua Anôk bruă gĭt gai ala čar kơ hdră gang mkhư̆ klei ruă Covid-19 bi kƀĭn online hŏng khua gĭt gai čar Bắc Ninh leh anăn Bắc Giang kơ hdră msir gang mkhư̆ klei ruă Covid-19 hlăm boh klei ară anei. Mñă klă kơ bruă dŭm wăl bi ktlah, kwang dar, alŭ să kmtă, dŭm čar brei mkra mđĭ bi jăk klei anei. Êngao anăn, brei lŏ dơ̆ng ktuê dlăng hlăm êpul êya, bi mguôp hŏng bruă mă mta ksiêm mkă hlăm dŭm krĭng wăl, ba yua dŭm kdrăp hâo hưn klei suaih pral čiăng hiu duah. Dŭm hruê êgao, mơ̆ng kdrăp hiu duah, ƀuh leh êbeh 5 êtuh čô đing djŏ klei ruă čiăng mă mta ksiêm mkă. K’iăng Khua knŭk kna Vũ Đức Đam brei thâo, čar Bắc Ninh leh anăn Bắc Giang ba mdah hdră msir dăp mnuih mă bruă leh anăn huă ƀơ̆ng đih đăm ti anôk bruă mnia blei, anei jing hdră msir êjai, brei hnưm mâo hdră msir hơĭt kjăp hĭn.

H Zawut pô mblang