VOV4.Êđê- Tlam hruê 9/7 mbruê, gĭt gai Klei bi kƀĭn online plah wah Anôk bruă ala čar gĭt gai hdră gang mkhư̆ klei ruă hŏng 2 čar Phú Yên lehanăn Khánh Hòa, K’iăng khua knŭk kna Vũ Đức Đam, Khua Anôk bruă ala čar gĭt gai mtă kơ 2 čar anei hluê ngă kjăp klei kčah mtrŭn gang mkhư̆ klei ruă Covid 19 hlăm krĭng kwang dar lehanăn bi ktlah yang ƀuôn, hluê ngă čuăl krĭng kwang dar, bi ktlah yang ƀuôn ti anôk mâo klei ruă mbĭt anăn brei kriê dlăng kjăp ti dŭm anôk leh čuăl krĭng.

Hlăm 1 hruê kăm hŏng anei, ênoh mnuih ruă ti čar Phú Yên mâo klei bi êdah đĭ, kah knar mâo mơ̆ng 30 – 40 čô mnuih. Ară anei, Phú Yên ba yua leh hdră bi ktlah yang ƀuôn hluê ngă Asăp mtrŭn mrô 16 hlăm kluôm čar. Hŏng giăm 190 čô mnuih ruă Covid 19 mâo čih yap, čar Khánh Hòa ăt bi mklă leh hdră bi ktlah yang ƀuôn hluê ngă Asăp mtrŭn mrô 16 hŏng ƀuôn prŏng Nha Trang, wăl krah Ninh Hòa lehanăn kdriêk Vạn Ninh. Ti anăp klei, 2 čar Phú Yên lehanăn Khánh Hòa ba yua hdră kwang dar lehanăn bi ktlah yang ƀuôn hluê hdră mdê mdê, K’iăng khua knŭk kna Vũ Đức Đam mtă, bruă yuôm bhăn ară anei jing brei hluê ngă kjăp hdră kwang dar lehanăn bi ktlah yang ƀuôn./.

Pô mblang: H’Nêč Êñuôl