VOV4.Êđê- Bruă mjêč ară anei brei bi tiŏ êran hŏng hruê mmông, hŏng mnĭt kñăm mdrơ̆ng hŏng klei ruă Covid 19. Brei drei thâo săn asei pô, bruă duh mkra, mnuih ƀuôn sang lui hĕ klei m’ak mơ̆ng pô, tŭ klei dleh dlan hlăm sa wưng čiăng dưi mdrơ̆ng hŏng klei ruă tưp bi tŭ dưn. Tơdah amâo mđing răng, srăng tŭ lu klei luič liê. Anei jing klei bi mklă mơ̆ng K’iăng khua knŭk kna Vũ Đức Đam, Khua anôk bruă ala čar gĭt gai hdră gang mkhư̆ klei ruă Covid 19 ti anôk ksiêm dlăng hdră gang mkhư̆, dŏng mdrao mnuih ruă Covid 19 ti Sang êa drao kahan mrô 175, Phŭn bruă lĭng kahan hlăm hruê 27/7. Ti anôk mă bruă, Thiếu tướng Nguyễn Hồng Sơn, Khua Sang êa drao kahan mrô 175 brei leh sang êa drao anei mkŏ mjing dŭm hdră bruă kăp dŏng mdrao mnuih ruă Covid 19 ti gưl prŏng hĭn, huĭdah ênoh mnuih ruă srăng đĭ. Sang êa drao ăt akâo hŏng ƀuôn prŏng Hồ Chí Minh đru kơ kdrăp mnơ̆ng yua hlăm bruă mdrao mgŭn, phŭn vaccine đru gang mkhư̆ Covid 19... K’iăng khua knŭk kna Vũ Đức Đam mtă kơ ƀuôn prŏng Hồ Chí Minh mđing dŏng mdrao mnuih ruă Covid 19 hŏng mta kñăm bi hrŏ tuič hnơ̆ng ênoh mnuih djiê. Hruê kăm êgao, ênoh mnuih ruă kah knar grăp hruê ti ƀuôn prŏng Hồ Chí Minh ăt êbeh 4 êbâo čô, lu hĭn êdi hlăm kluôm ala./.

Pô mblang: H’Nêč Êñuôl