VOV4.Êđê -  Tlam mbruê 12/7, bi kƀĭn online hŏng dŭm čar krĭng dap mnai êa krông Cửu Long kơ bruă gang mkhư̆ klei ruă tưp Covid-19, K’iăng khua knŭk kna Vũ Đức Đam, khua êpul gĭt gai ala čar mtă kơ dŭm alŭ wăl čŏng mprăp dŭm hdră êlan gang mkhư̆ klei ruă tưp lŏ đĭ sa hnơ̆ng, hlăm anăn mâo bruă lŏ wĭt ksiêm dlăng klei thâo hlăm bruă ksiêm mkă kman, ênoh mta ksiêm mkă kman, dŭm anôk mdrao mgŭn. Hlăm klei kƀĭn, khua gĭt gai dŭm čar tỉnh (Tiền Giang, Bến Tre, Hậu Giang, Sóc Trăng, Đồng Tháp, Vĩnh Long, Trà Vinh, An Giang, Kiên Giang, Cà Mau, Bạc Liêu, Cần Thơ) hưn mdah leh klei jing mơ̆ng klei ruă tưp Covid-19 hlăm alŭ wăl. Tui hluê anăn, ênoh mnuih mâo klei ruă tưp hriê kơ đĭ kyua mâo lu mnuih wĭt mơ̆ng ƀuôn prŏng Hồ Chí Minh. Dŭm alŭ wăl bi êdah klă leh dŭm klei dleh dlan hlăm bruă gang mkhư̆ klei ruă tưp. K’iăng khua knŭk kna Vũ Đức Đam mñă ktang kơ bruă hâo hưn, iêu mthưr kơ mnuih ƀuôn sang wĭt mơ̆ng ƀuôn prŏng Hồ Chí Minh srăng hưn mdah klei suaih pral, bi êdah anăn čiăng ênưih ksiêm dlăng. K’iăng khua knŭk kna lŏ mtă kơ čar Cần Thơ, jing alŭ wăl mâo sang hră gưl prŏng bruă mdrao mgŭn, sang êa drao prŏng, srăng mprăp ai tiê đru kơ dŭm alŭ wăl jĕ giăm. Phŭn bruă mdrao mgŭn rơ̆ng mâo djăp kdrăp ksiêm mkă kman kơ dŭm čar krĭng dap mnai êa krông Cửu Long

Y Ƀel pô mblang