VOV4.Êđê - K’iăng khua knŭk kna Vũ Đức Đam, khua êpul gĭt gai ala čar bruă gang mkhư̆ klei ruă tưp Covid-19 mrâo mâo klei kƀĭn online hŏng êpul khua kiă kriê čar Đồng Nai. Blŭ gĭt gai hlăm klei kƀĭn, k’iăng khua knŭk kna Vũ Đức Đam mñă klă, čar Đồng Nai jing čar bi knông hŏng ƀuôn prŏng Hồ Chí Minh lehanăn mâo 500.000 čô mnuih mă bruă hlăm dŭm anôk tuh tia, mâo lu kdrŭn êdeh, jĕ giăm hŏng čar Bình Dương… Tơdah klei ruă mŭt ti anôk anei srăng jing klei dleh dlan êdi.

Kyuanăn čar Đồng Nai čiăng ksiêm dlăng kjăp dŭm čô mơ̆ng ƀuôn Hồ Chí Minh, Bình Dương nao kơ čar Đồng Nai lehanăn mklăt wĭt hŏng anăn. K’iăng khua knŭk kna mñă klă, ksiêm dlăng amâo djŏ klei kăm ghă ôh, ƀiădah srăng dưn yua kdrăp mrâo mrang čiăng dưi ksiêm dlăng mnuih êrô êbat. Tơdah mâo klei ruă, êpul khua gĭt gai čar Đồng Nai čiăng ngă hmar bruă čuăl krĭng mơ̆ng êlâo, rơ̆ng mâo ênŭm mnơ̆ng dhơ̆ng yua čiăng kơ êpul mă bruă bruă mdrao mgŭn mâo klei hơĭt êjai mă bruă gang mkhư̆ klei ruă tưp.