VOV4.Êđê- Tlam mbrue 2/8, tĭ anôk bruă knŭk kna, k’iăng khua knŭk kna Vũ Đức Đam, khua êpul gĭt gai bruă gang mkhư̆ klei ruă tưp Covid-19 gĭt gai leh klei kƀĭn online hŏng ƀuôn prŏng Hồ Chí Minh čiăng tui ngă dŭm hdră êlan gang mkhư̆ klei ruă tưp Covid-19. Hưn mdah hlăm klei kƀĭn, khua kiă kriê bruă sang čư̆ êa ƀuôn prŏng Hồ Chí Minh Nguyễn Thành Phong brei thâo, ƀuôn prŏng hyuă kjăp hĭn leh bruă tui ngă hdră mtrŭn mrô 16 mơ̆ng khua knŭk kna tui si bruă ngă “klă - sĭt - kjăp - tŭ dưn”, rơ̆ng dưi ngă hrăm mbĭt hlăm alŭ wăl, bi klă 7 êpul mnuih dưi kƀiă mơ̆ng pưk sang mơ̆ng 6 mmông mmăt truh kơ 6 mmông aguah hruê êdei. Ăt hlăm klei kƀĭn, k’iăng khua knŭk kna Vũ Đức Đam mtă kơ phung bruă mdrao mgŭn lŏ mkăp brei vaccine kơ ƀuôn prŏng Hồ Chí Minh čiăng amâo bi kdung ôh bruă tlŏ mgang. k’iăng khua knŭk kna Vũ Đức Đam lŏ mtă kơ ƀuôn prŏng Hồ Chí Minh lŏ mâo dŭm hdră êlan ktang hĭn čiăng dưi rơ̆ng klei êđăp ênang, bi mlih anôk mâo klei hyưt jing anôk êđăp ênang kơ jih jang kdriêk čar, kdriêk. Êpul gĭt gai bruă gang mkhư̆ klei ruă tưp Covid-19 mñă klă bruă tlŏ mgang vaccine jing klei jăk lehanăn bruă klam grăp čô kyua klei suaih prăl pô lehanăn kyua yang ƀuôn.

Pô mblang: Y-Ƀel Êban