VOV4.Êđê - Hruê 28-7, K’iăng Khua Knŭk kna Vũ Đức Đam ksiêm dlăng bruă gang mkhư̆ klei ruă Covid-19 ti Long An. K’iăng Khua Knŭk kna Vũ Đức Đam leh anăn êpul mă bruă nao ksiêm dlăng, êmuh hrăm leh anăn mđĭ ai êpul knuă druh, phung mă bruă mdrao mgŭn dôk mă bruă ti Sang êa drao jing jai mrô 2- kdriêk Tân Trụ, sang êa drao jing jai ti Sang hră kđi čar Long An leh anăn dŭm anôk bruă mdrao mgŭn ti čar Long An.

Hluê si klei hâo hưn, čar Long An mâo 16 anôk ngă bruă bi ktlah hjăn, mdrao mgŭn phung F0 hŏng hnơ̆ng 5.070 jhưng đih mdrao. Čiăng pral ktuê dlăng, mkhư̆ klei ruă tưp hlăm wưng hnưm hĭn, yap mơ̆ng hruê 27-7 Long An mtă kơ mnuih ƀuôn sang mkhư̆ jih hnơ̆ng kbiă hlăm ktuê êlan. Hlăm wưng kơ anăp, Long An lŏ dơ̆ng ngă bi jăk, jih ai tiê, djăp ênŭm dŭm hdră msir hluê ngă Asăp mtrŭn mrô 16 mơ̆ng Khua Knŭk kna.

H Zawut pô mblang