VOV4.Êđê- Aguah mbruê 20-7, K’iăng Khua knŭk kna Vũ Đức Đam ngă khua êpul mă bruă gưl dlông nao čhưn, mă bruă leh anăn ksiêm dlăng bruă gang mkhư̆ klei ruă tưp Covid-19 ti Bình Dương. Anôk tal êlâo Êpul mă bruă nao ksiêm dlăng jing Knơ̆ng bruă Yazaki EDS Việt Nam, ti ƀuôn prŏng Dĩ An. Knơ̆ng bruă dôk hluê ngă hdră msir "3 tinăn” (huă ƀơ̆ng - pĭt- mă bruă ti sang mkra mjing) kơ giăm 400 čô mnuih mă bruă čiăng rơ̆ng kơ bruă mkra mjing leh anăn gang mkhư̆ klei ruă Covid-19. Mơ̆ng bruă ksiêm dlăng hdră gang mkhư̆ klei ruă tưp ti anôk bruă mnia blei, K’iăng Khua knŭk kna mtă kơ dŭm knơ̆ng bruă ti čar Bình Dương leh pŏk ngă hdră “ 3 tinăn” brei mkăp jih jang ênoh mrô kơ mnuih mă bruă kơ bruă sang čư̆ êa alŭ wăl čiăng găl ênưih leh anăn pral hlăm hdră ksiêm dlăng klei ruă tơdah anôk bruă mâo phung ruă, đing ruă. Tlam, K’iăng Khua knŭk kna Vũ Đức Đam hŏng êpul mă bruă Gưl dlông bi kƀĭn hŏng phung khua gĭt gai čar Bình Dương kơ bruă gang mkhư̆ klei ruă tưp.

Pô mblang: H’Zawut Ƀuôn Yă