VOV4.Êđê- K’iăng khua knŭk kna Vũ Đức Đam mâo leh mmông mă bruă hŏng čar Bình Dương kơ hdră gang mkhư̆ klei ruă Covid 19. Hluê si phung khua kiă kriê čar Bình Dương, lu anôk bluh mâo klei ruă hlăm êpul êya yang ƀuôn dưi ksiêm dlăng kjăp leh. Čar Bình Dương dôk hyuă kjăp bruă kriê dlăng grăp alŭ wăl, dŭm alŭ wăl dôk mđĭ hdră tui ksiêm, phat mkra dŭm klei ngă soh.

Bi mni klei gĭr mơ̆ng anôk bruă sang čư̆ êa lehanăn mnuih ƀuôn sang čar Bình Dương hlăm hdră gang mkhư̆ klei ruă tưp lehanăn dŏng mdrao mnuih ruă Covid 19, K’iăng khua knŭk kna Vũ Đức Đam bi êdah klei m’ak hlăk phung khua kiă kriê dŭm gưl lehanăn mnuih ƀuôn sang Bình Dương hrăm mbĭt gĭr ktưn truh kơ hruê 15/8 srăng dưi ksiêm dlăng kjăp klei ruă ti 5/9 kdriêk, wăl krah lehanăn ƀuôn prŏng. Truh ti hruê 30/8, srăng dưi ksiêm dlăng 4 wăl krah, ƀuôn prŏng adôk siă hŏng ƀuôn prŏng Hồ Chí Minh, amâo tĭng ôh dŭm anôk dôk bluh mâo lu mnuih ruă dưi čuăl krĭng, lŏ dơ̆ng ksiêm dlăng kjăp, dlăng kluôm čar Bình Dương srăng lŏ wĭt hŏng klei hdĭp jăk msĕ êlâo./.

Pô mblang: H’Nêč Êñuôl