VOV4.Êđê - “Tây Ninh mđĭ hĭn hdră ksiêm dlăng ti dŭm anôk huĭ srăng mâo lu mnuih ruă, pral mjing dŭm krĭng mtah êđăp ênang, čiăng kơ mnuih ƀuôn sang hnưm lŏ wĭt hŏng klei hdĭp aguah tlam”, Anei jing klei mtă mơ̆ng K’iăng khua knŭk kna Vũ Đức Đam, Khua anôk bruă ala čar gĭt gai hdră gang mkhư̆ klei ruă Covid 19 ti anôk mă bruă hŏng čar Tây Ninh kơ hdră gang mkhư̆ klei ruă tưp ară anei. Mơ̆ng leh bluh mâo klei ruă Covid 19 truh kơ ară anei, čar mâo leh 3.296 čô ruă Covid 19. Ară anei, 2 krĭng hlăm čar mâo ênoh mnuih ruă đĭ lu jing wăl krah Trảng Bàng lehanăn kdriêk Dương Minh Châu. Ba yua wưng bi ktlah yang ƀuôn hluê si asăp mtrŭn mrô 16, čar mđing kơ bruă tui duah, mkă dlăng kman hŏng ai tiê krơ̆ng kjăp lehanăn pŏk mlar krĭng mtah êđăp ênang, čuăl krĭng ksiêm dlăng kman hlăm ênhă prŏng, amâo lui klei ruă tưp lar ti krĭng mkăn. Ară anei, Tây Ninh pral čih mkra leh hdră dŏng mdrao 5000 -10 êbâo čô ruă kñăm mâo hdră dŏng mdrao djŏ guôp. Hlăm anăn, mkŏ mjing 5 boh sang êa drao jing jai./.

H Nêč pô mblang