VOV4.Êđê-K’iăng khua knŭk kna Vũ Đức Đam mrâo mă leh bruă hŏng phung khua kiă kriê kdriêk čar mrô 6, mrô 7, kdriêk Bình Chánh, ƀuôn prŏng Hồ Chí minh kơ bruă mprăp kơ klei bi ktlah yang ƀuôn hlue asăp mtrŭn mrô 16 CT-TTg. Êngao kơ dŭm mta klei khua knŭk kna bi klă leh ti anôk bi kƀĭn online aguah hrue 8/7, k’iăng khua knŭk kna Vũ Đức Đam mtă kơ ƀuôn prŏng Hồ Chí Minh kơ 4 mta klei hlăm wưng dôk ngă klei bi ktlah yang ƀuôn hlue si asăp mtrŭn mrô 16/CT-TTg.

Hlăm anăn, ƀuôn prŏng Hồ Chí Minh mâo mta kñăm prŏng hĭn, ktang hĭn čiăng kơ leh 15 hrue dưi mâo yơh krĭng êđăp ênang mơ̆ng klei ruă tưp, dưi ƀuh hlăm kluôm ƀuôn prŏng hlŏng truh kơ dŭm boh kdriêk čar, kdriêk lehanăn dŭm boh să, ƀuôn hgŭm. Čiang dưi mâo msĕ snăn, jing sa bruă prŏng ƀuôn prŏng Hồ Chí Minh bi mâo “Hdră ngă hŏng klei ktang” ƀhĭ ênŭm hlăm grăp hrue, mâo mta kñăm bi truh ngă, dŭm mta bruă kơ bruă sang čư̆ êa, dŭm anôk bruă, êpul bruă, phung duh mkra, lehanăn phung ƀuôn sang ngă hĕ. Bi êdah klă jih jang bruă ngă hŏng phung ƀuôn sang, hŏng yang ƀuôn thâo lehanăn tui ngă./.

Pô mblang: Y-Khem Niê