VOV4.Êđê- Hlăm klei bi kƀĭn online hŏng 2 čar Bắc Ninh lehanăn Bắc Giang tlăm mbruê 7/6, k’iăng khua knŭk kna Vũ Đức Đam, khua êpul gĭt gai ala čar mtă kơ čar Bắc Ninh mâo klei răng kơ anôk mâo klei ruă mrâo ti knơ̆ng bruă AAC. Ti čar Bắc Ninh, mâo 3 alŭ wăl ăt dôk mâo mnuih mâo klei ruă tưp Covid-19 mrâo, anăn jing kdriêk Thuận Thành, kdriêk Quế Võ lehanăn ƀuôn prŏng Bắc Ninh. Êlâo kơ bruă, ti kdriêk Thuận Thanh mĭn tĭng srăng mâo 58 alŭ srăng bi mlih mơ̆ng čuăl krĭng jing bi kbưi yang ƀuôn, k’iăng khua knŭk kna Vũ Đức Đam mtă kơ dŭm alŭ wăl amâo ngă ngơi mang, luič klei răng. Truh kơ ară anei, ti čar Bắc Giang, dưi ksiêm dlăng leh klei tưp lar klei ruă êjai 5.800 mta mkă kman hlăm yang ƀuôn amâo mâo buh ôh kman. K’iăng khua knŭk kna Vũ Đức Đam lŏ mñă klă, bruă ksiêm dlăng kjăp dŭm anôk bi ktlah mbĭt, anôk čuăl krĭng lehanăn bi kbưi yang ƀuôn jing yuôm bhăn êdi, ti anôk mâo bruă Đảng nah gŭ, bruă sang čư̆ êa alŭ wăl ngă djŏ dŭm klei bhiăn hlăm bruă gang mkhư̆ klei ruă tưp, mâo ai tiê bruă klam, anôk anăn srăng mâo klei êđăp ênang lehanăn hmưn bi hrŏ klei ruă tưp.

Pô mblang: Y-Ƀel Êban