VOV4.Êđê - Aguah mbruê (4/8), k’iăng khua knŭk kna Vũ Đức Đam, khua êpul gĭt gai ala čar bruă gang mkhư̆ klei ruă tưp Covid-19 nao ksiêm dlăng leh bruă tlŏ mgang ti kdriêk čar Čầu Giấy, ksiêm dlăng bruă bi kbưi yang ƀuôn hlăm đa đa phŭn, dhar bruă lehanăn nao ksiêm dlăng bruă gang mkhư̆ klei ruă tưp Covid-19 hlăm dŭm anôk čuăl krĭng, anôk bi ktlah ti alŭ wăl ƀuôn prŏng Hà Nội. K’iăng khua knŭk kna yap yuôm bhăn bruă ƀuôn prŏng Hà Nội ngă leh bruă tlŏ mgang, rơ̆ng mâo ênŭm klei găl dưi gang mkhư̆ klei ruă tưp, mâo anôk ngă bruă êđăp lehanăn ngă bruă bi kbưi, hưn mdah klei suaih pral hŏng klei ênŭm. Bi kơ bruă tui duah, ksiêm mkă kman, bi ktlah čiăng ngă klei čuăl krĭng, mdjiê kman anôk mâo klei ruă tưp. k’iăng khua knŭk kna kčĕ čiăng ngă bruă hmar hĭn, mgaih msir jăk, kñăm dưi mkŏ mjing hŏng klei êđăp ênang kjăp, čuăl krĭng hmar dŭm anôk mâo klei ruă tưp. K’iăng khua knŭk kna Vũ Đức Đam mñă klă, dŭm hdră êlan gang mkhư̆ klei ruă tưp brei mâo boh tŭ dưn êlâo hĭn./.

Y Bel pô mblang