VOV4.Êđê- Hlăm klei hriê čuă čhưn ala čar Việt Nam ƀri hlăm wưng bi hdơr 50 thŭn hruê mkŏ mjing klei mjĕ mgiăm bruă hŏng tač êngao 2 ala čar Việt Nam - Thụy Sỹ. k’iăng khua mil čhil, khua phŭn bruă hŏng tač êngao Thụy Sỹ mâo leh klei bi tuôm hŏng k’iăng khua lăn čar Võ Thị Ánh Xuân. Hlăm klei tŭ drông anăn, k’iăng khua lăn čar Võ Thị Ánh Xuân bi êdah klei hơ̆k mơak ti anăp klei ƀĭng hgŭm hriê kơ siam plah wah 2 ala čar, lač kơ 2 ala čar mâo klei bi mguôp hĭn, mâo boh tŭ dưn hĭn, klă klơ̆ng hĭn kyua klei jăk kơ 2 ala čar.

Mbĭt anăn lŏ bi mguôp hlăm klei êđăp ênang, hơĭt kjăp klei bi mguôp hlăm alŭ wăl lehanăn tar rŏng lăn. K’iăng khua mil čhil Ignazio Cassis yap yuôm bhăn dŭm klei gĭr lehanăn klei đru hlăm dŭm klei dleh dlan mơ̆ng Việt Nam kơ bruă mdrơ̆ng hŏng klei ruă tưp Covid-19, hâo hưn knŭk kna Thụy Sỹ srăng lŏ đru kơ Việt Nam 500.000 kdrăp ksiêm mkă kman hmar, 300.000 blah čhiăm guôm ƀô̆ lehanăn 30 masin êwa oxi hŏng ênoh hlăm brô 120 êklai prăk.

Pô mblang: Y-Ƀel Êban