VOV4.Êđê- Adŭ bruă Khua mil čhil Mi mrâo hưn K’iăng Khua mil čhil Mi Kamala Harris  srăng hriê čhưn ti Việt Nam leh anăn Singapore hlăm mlan 8/2021. Gưl nao čhưn kñăm bi trông hŏng phung khua gĭt gai dua ala čar kơ lu mta bruă hdơ̆ng bi mding, hlăm anăn mâo klei êđăp ênang krĭng wăl, klei kluôm rŏng lăn mdrơ̆ng hŏng klei ruă Covid-19, klei bi mlih yan adiê leh anăn dŭm klei gĭr ktưn mbĭt kñăm mđĭ klei êđăp ênang quốc tế mơ̆ng tur knơ̆ng hdră bhiăn.

Gưl nao čhưn srăng đru mguôp hyuă kjăp klei bi hgŭm leh anăn pŏk mlar klei bi hgŭm bruă duh mkra hŏng dua ala čar phŭn mơ̆ng Mi ti krĭng ksĭ Indian- Pacific. Gưl hriê čhưn ti Việt Nam mơ̆ng khua phŭn bruă Lloyd Austin lŏ dơ̆nh đru mguôp mđĭ klei bi hgŭm, đaŏ knang plah wah mnuih ƀuôn sang leh anăn Êpul lĭng kahan dua ala čar, pŏk ngă dŭm boh phŭn bi hgŭm hlăm bruă răng mgang ala čar bi siñê leh plah wah Khua phŭn bruă lĭng kahan leh anăn klei kuôl kă mơ̆ng khua gĭt gai gưl dlông dua ala čar, đru mguôp hlăm jar ƀĭng hgŭm kluôm ênŭm Việt Nam- Mi.

Pô mblang: H’Zawut Ƀuôn Yă