VOV4.Êđê - Aguah mbruê (11/7), êpul ngă bruă mơ̆ng phŭn bruă mdrao mgŭn mơ̆ng k’iăng khua phŭng bruă mdrao mgŭn Đỗ Xuân Tuyên jing khua êpul, mâo leh klei mă bruă hŏng êpul gĭt gai bruă gang mkhư̆ klei ruă tưp Covid-19 čar Dak Lak kơ bruă gang mkhư̆ klei ruă tưp Covid-19 hlăm alŭ wăl. Yap truh hruê 11/7, čar Dak Lak mâo 7 čô mnuih mâo klei ruă tưp Covid-19, hlăm anăn mâo 4 čô dưi mdrao hlao leh.

Dŭm čô mâo klei ruă tưp ta čar Dak Lak jing dŭm čô djŏ tuôm hŏng dŭm anôk mâo klei ruă tưp msĕ si: Đà Nẵng, Bắc Ninh lehanăn ƀuôn prŏng Hồ Chí Minh. Čar Dak Lak ăt dôk bi ktlah mbĭt 139 čô mnuih lehanăn bi ktlah ti sang giăm 9 êbâo čô mnuih. Bi kơ klei thâo hlăm bruă tui duah, čar Dak Lak mkŏ mjing leh 280 êpul ngă bruă mjêč kơ bruă gang mkhư̆ klei ruă tưp. Blŭ hlăm klei mă bruă anăn, k’iăng khua phŭn bruă hŏng tač êngao Đỗ Xuân Tuyên yap yuôm bhăn dŭm bruă ngă gang mkhư̆ klei ruă tưp mơ̆ng čar Dak Lak hlăm dŭm hruê mmông êgao, mtă kơ alŭ wăl mâo klei kñăm kơ ênoh mnuih mă bruă, mnơ̆ng dhơ̆ng yua hlăm bruă mdrao mgŭn čiăng mprăp kơ bruă gang mkhư̆ klei ruă tưp hruê mmông kơ anăp.

Y Ƀel pô mblang