VOV4.Êđê - Giăm 2 thŭn hŏng anei, leh klei ruă Covid-19 bluh mâo ăt jing mmông phung lĭng kahan răng mgang knông lăn, knuă druh mdrao mgŭn hŏng dŭm êpul bruă djŏ tuôm ti čar Dak Lak yap dliê, lehanăn knông lăn jing sang. Knŏng hŏng dŭm sang tum jing jai, anôk tŭk knă điêt, hŏng mmông huă ƀơ̆ng ruăt kuăt, diñu dưi găn leh djăp klei dleh dlan, lông dlăng gang mkhư̆ klei mŭt kbiă soh hdră bhiăn ktuê dlăng klei ruă tưp, jing anôk gang mkhư̆ kjăp ktang ti anôk phŭn mdrơ̆ng hŏng klei ruă tưp, ba klei êđăp ênang kơ yang ƀuôn.

Dak Lak mâo êbeh 70 km êlan knông lăn hŏng ala mtao Campuchia. Mơ̆ng leh bluh mâo klei ruă Covid 19, lĭng kahan răng mgang knông lăn čar mkŏ mjing leh 7 anôk ksiêm dlăng lehanăn dŭm pluh êpul hiu ksiêm dlăng kñăm kiă kriê kjăp bruă mnuih ƀuôn sang dua ala čar găn êrô ti knông lăn, pral hmao ƀuh mnuih tlĕ găn knông lăn soh hdră bhiăn čiăng hluê ngă hdră bi ktlah, mkă dlăng kman klei ruă gang mkhư̆ klei ruă tưp đĭ lar. Čiăng dôk gak răng jih hruê mlam 24/24, phung lĭng kahan mđĭ leh hdră duh mkra, pla mjing djam mtam, rông mnŭ da kñăm mkăp djăp ênŭm mnơ̆ng dhơ̆ng yua. Khădah dôk hlăm anôk amâo mâo găl, amâo djăp ênŭm ƀiădah phung knuă druh, lĭng kahan mnĭt hŏng êpul djŏ tuôm ăt gĭr hgao klei dleh dlan, gĭr bi leh bruă klam mâo kčah jao, ba wĭt klei h’ĭt ênang kơ mnuih ƀuôn sang. Thượng tá Nguyễn Minh Tuyên, K’iăng khua gĭt gai, Khua anôk bruă gang mkhư̆ klei ruă Covid 19 Lĭng kahan răng mgang knông lăn čar Dak Lak brei thâo “Klei dleh dlan hĭn mơ̆ng hmei jing hlăm yan bhang, yan adiê mđiă hlơr thu krô, klei bi mlih yan adiê ngă leh kơ adiê krĭng knông lăn hlơr ktang, kƀah êa yua, klei ruă tưp, kêč ƀloh lu. Ƀiădah hmei ăt gĭr msir mghaih mơh. Mâo klei mđing dlăng mơ̆ng êpul êya, phung mâo ai tiê kmah, hmei dưi mâo djăp leh mnơ̆ng dhơ̆ng čiăng kơ phung lĭng kahan h’ĭt ai tiê mă bruă knuă, bi leh bruă klam mâo kčah jao”.

Mơ̆ng leh klei ruă Covid 19 bluh mâo, ăt msĕ hŏng anôk bruă mdrao mgŭn kluôm ala, phung nai aê mdrao čar Dak Lak amâo mâo hruê mdei. Ti Sang êa drao mdrao klei ruă Hnak lehanăn klei ruă Ksŏ čar Dak Lak, anôk dôk dŏng mdrao kơ mnuih ruă Covid 19, leh mâo dŏng mdrao mnuih ruă tal êlâo, phung nai aê mdrao ăt mâo klei mđing uêñ, huĭ kyua mơ̆ng êlâo adih truh kơ ară anei, ka mâo sa mta klei ruă tưp mâo hnơ̆ng tưp lar pral, ktang lehanăn huĭ hyưt msĕ si Covid 19. Ƀiădah hŏng klei đua klam, jih jang phung aê mdrao jing sa čô lĭng kahan jhŏng ktang, gĭr mdrơ̆ng hŏng djăp klei huĭ hyưt čiăng dŏng mdrao kơ mnuih ruă. Aê mdrao Nông Thị Điểm, Khua adŭ mdrao klei ruă Nội 3, Sang êa drao mdrao klei ruă Hnak lehanăn klei ruă Ksŏ čar Dak Lak, pô dŏng mdrao kơ mnuih ruă Covid 10 lač snei: “Kâo thâo klei ruă Covid 19 huĭ hyưt êdi, hmăi truh kơ klei suaih pral lehanăn klei hdĭp mnuih ruă, jing sa čô aê mdrao, jing êpul ba anăp hlăm hdră dŏng mdrao, kâo ăt mprăp ai tiê lehanăn lui êjai bruă mkăn čiăng jih ai tiê dŏng mdrao kơ mnuih ruă, kriê dlăng klei suaih pral mnuih ruă dôk dŏng mdrao tinei. Tơdah hlăm wưng ti anăp lŏ mâo mnuih ruă Covid 19, kâo ăt mprăp ai tiê dŏng mdrao kơ jih jang digơ̆.

Jing sa hlăm dŭm čô ruă Covid 19 tal êlâo ti čar Dak Lak, hlăm wưng dŏng mdrao, mâo phung nai aê mdrao kriê dlăng, klei hdơr êdi hlăm klei mĭn pô ruă 601 amâo djŏ jing kman djiê mnuih Sar CoV2 ôh ƀiădah jing klei gĭr, mă bruă hŏng jih ai tiê mơ̆ng phung nai aê mdrao, hrăm mbĭt hŏng mnuih ruă, mđĭ ai hgao klei huĭ hyưt lehanăn dleh dlan kyua klei ruă tưp ngă. Pô ruă 601 brei thâo: “Thâo pô mâo klei ruă kâo huĭ hyưt êdi yơh kyua amâo thâo si arăng srăng bi mĭn kơ pô, arăng huĭ, arăng lŏ mjĕ mŏ hŏng pô, hŏng anak čô, hŏng gŏ sang, găp djuê pô srăng tlă anăp hŏng klei arăng bi hing snei adih. Kyua mâo klei mđĭ ai mơ̆ng phung nai aê mdrao lehanăn gŏ sang, đru leh kơ kâo h’ĭt ai tiê dôk gĭr dŏng mdrao. Kâo lač jăk êdi kơ phung nai aê mdrao tinei jih ai tiê dŏng mdrao kơ mnuih ruă msĕ si kâo.

Mơ̆ng dŭm hruê tal êlâo klei ruă Covid 19 bluh mâo, phung nai aê mdrao ti anôk bruă gang mkhư̆ klei ruă tưp čar Dak Lak kčưm dơ̆ng mâo hruê amâo mâo pĭt. Leh mâo klei hưn kơ mnuih đing mâo klei ruă Covid 19 amâo dah mâo mnuih wĭt mŏng krĭng mâo klei ruă tưp, amâo uêñ kơ ya mmông, phung knuă druh anôk bruă gang mkhư̆ klei ruă tưp mkŏ mjing mtam hdră ksiêm dlăng, tui duah, čuăl krĭng, ksiêm dlăng kman, grăp hruê nao truh kơ grăp alŭ, khŏk ƀăng grăp sang, ksiêm dlăng djăp mnuih. Hŏng mnuih mâo klei bi êdah mŏng klei ruă, tuôm êrô hiu lu anôk, dleh dưi ksiêm dlăng, phung knuă druh anôk bruă mdrao mgŭn hĭn mơh lŏ suaĭ. Dŭm hruê tal êlâo nao hlăm hdră gang mkhư̆ klei ruă, kdrăp mnơ̆ng răng mgang asei mlei dôk kƀah, hlăk kreh bi tuôm hŏng mnuih mâo kman klei ruă huĭ hyưt, phung nai aê mdrao mâo mơh klei mĭn huĭ hyưt ƀiădah gĭr bi mđĭ ai nanao hdơ̆ng găp, mtă brei răng. Aê mdrao Lê Phúc, K’iăng khua anôk bruă ksiêm dlăng klei ruă tưp čar Dak Lak brei thâo: “Knuă druh, mnuih mă bruă Anôk bruă ksiêm dlăng klei ruă tưp gĭr jih ao tiê hluê ngă djăp ênŭm dŭm mta hră m’ar, dŭm klei gĭt gai mŏng Anôk bruă gĭt gai dŭm gưl lehanăn hlăm wưng êgao, Anôk bruă ngă leh jăk hdră gang mkhư̆ klei ruă Covid 19 lehanăn dŭm klei ruă mkăn bluh mâo ti alŭ wăl. Hmei mprăp nanao ai tiê tơdah mâo klei iêu nao hlăm hdră gang mkhư̆ klei ruă tưp. Hlăm wưng ară anei, bruă gang mkhư̆ klei ruă Covid 19 jing bruă brei hluê ngă pral, mjêč kyua anăn bruă hluê ngă dŭm bruă hlăm hdră gang mkhư̆ klei ruă Covid 19 lehanăn dŭm klei ruă mkăn brei hluê ngă hŏng sa hdră mđrăm mbĭt, tŭ dưn, pral hmao ƀuh, tui duah, čuăl krĭng, msir mghaih pral. Snăn kơh dưi gang mkhư̆ klei đĭ lar mơ̆ng klei ruă anei hlăm êpul êya yang ƀuôn.

Kyua klei săn asei ñăt kriêp mơ̆ng êpul nai aê mdrao, phung mă bruă mdrao mgŭn gang mkhư̆ klei ruă tưp, phung knuă druh, lĭng kahan mă bruă ti krĭng knông lăn, anôk tal êlâo nao hlăm hdră gang mkhư̆ klei ruă ti čar Dak Lak, truh kơ ară anei, dưi mñă klă snei, mnuih ƀuôn sang drei dưi răng mgang êđăp ênang, klei ruă Covid 19 ăt dưi ksiêm dlăng kjăp. Hdră mdrơ̆ng hŏng klei ruă Covid 19 ăt dôk tlă anăp hŏng lu klei dleh dlan lehanăn lông dlăng ti anăp. Klei ruă anei hlăm tar rŏng lăn ăt dleh dưi ksiêm dlăng, khă snăn đăo knang hŏng klei gĭt gai kjăp mơ̆ng anôk bruă Đảng, Knŭk kna, klei hgŭm ngă bruă mơ̆ng jih anôk bruă kđi čar, ai tiê, klei đua klam hŏng mnuih ƀuôn sang mơ̆ng dŭm êpul êya djŏ tuôm, klei sa ai, hluê ngă kjăp mơ̆ng jih jang yang ƀuôn, Việt Nam klă sĭt srăng dưi msưh kdŭn klei ruă tưp anei./.