VOV4.Êđê - Klei bi kƀĭn bruă Dhar kreh kluôm ala pŏk ngă Hdră mtrŭn Klei bi kƀĭn bruă Đảng kluôm ala tal 13 mâo Phŭn bruă kđi čar, Anôk kiă kriê bruă Đảng mkŏ mjing mâo leh klei čang hmăng msĕ si sa “Klei bi kƀĭn Diên Hồng bruă dhar kreh mơ̆ng Đảng” mrâo mkŏ mjing ti Hà Nội. Ti anôk bi kƀĭn, phung bi ala mđing bi trông kơ bruă mkŏ mjing, pŏk hluê ngă Hdră êlan mtrŭn bruă dhar kreh truh ti thŭn 2030, mbĭt anăn bi mklă dŭm bruă kơ klei hlak mblang lehanăn boh sĭt mơ̆ng knhuah dhar kreh hlăm hdră mđĭ kyar pral, h’ĭt kjăp mơ̆ng lăn čar, ba mdah dŭm hdră msir klă klơ̆ng, djŏ guôp kñăm mtrŭt mđĭ kyar bruă dhar kreh, anak mnuih Việt Nam.

Klei hâo mdah ti anôk bi kƀĭn lač kla: Dhar kreh Việt Nam jing boh mơ̆ng dŭm êbâo thŭn mă bruă knuă hŏng klei thâo mĭn, klei mbruă, klei bi blah jih ai tiê rŭ mdơ̆ng lehanăn răng mgang ala čar, jing boh mơ̆ng klei bi mguôp mơ̆ng lu dhar kreh dlông rŏng lăn, čiăng amâo mâo mdei dưi bi kjăp. Leh 35 thŭn mlih mrâo lăn čar – dŭm gưl yang ƀuôn mđing hĭn êdi jing bruă mjuăt mjing anak mnuih kluôm ênŭm, bi hriăm mơ̆ng điêt, bi hriăm hră mơar, mjuăt mjing knhuah dôk dơ̆ng ƀơ̆ng huă, mjuăt kơ klei duh ƀơ̆ng. Blŭ hrăm ti anôk bi kƀĭn, Khua phŭn bruă dhar kreh mjuăt asei mlei, lehanăn hiu čhưn ênguê Nguyễn Văn Hùng lač: Dŭm klei tŭ dưn mơ̆ng knhuah dôk dơ̆ng ƀơ̆ng huă mâo leh mơ̆ng đưm năng bi kriê pioh lehanăn mđĭ bi lar, mlih mrâo hlue hŏng klei djŏ guôp hlăm bruă duh mkra mnia mblei, ñŭ kma hŏng tač êngao. Lu knhuah gru dhar kreh hing ang. Dŭm knhuah gru dhar kreh djuê ana mâo klei mđing, bi kriê pioh lehanăn mđĭ bi lar, boh nik hlăm bruă bi kriê pioh dhar kreh djăp djuê ana. “Hlăm jih jang dhar kreh Việt Nam leh 35 thŭn mlih mrâo brei ƀuh, klei thâo săng kơ dhar kreh, yang ƀuôn, anak mnuih ƀrư̆ hrue ƀrư̆ kluôm ênŭm, klă mngač hĭn. Klei mĭn knhuah dôk dơ̆ng ƀơ̆ng huă – mta phŭn kơ dhar kreh mâo leh dŭm klei bi mlih jăk, jih jang hdră êlan mơ̆ng klei bhiăn kơ dhar kreh lŏ dơ̆ng bi leh nanao, mjing djăp klei găl kơ phung ƀuôn sang jih ai tiê hgŭm mđĭ bi lar lehanăn dưn yua dhar kreh pô… Boh sĭt hlăm klei hdĭp mâo bi klă leh, êjai lăn čar dôk găn klei dleh dlan, snăn dŭm mta klei tŭ dưn mơ̆ng dhar kreh jăk siam djuê ana pô mâo lŏ bi kơrŭ, lŏ mđĭ lar ktang; ai tiê thâo khăp kơ lăn čar, klei thâo bi đru, hdĭp hlăm klei thâo khăp, jiă leh knhuah dhar kreh Việt Nam knư̆ êdah klă mngač hĭn”.

Ti anôk bi kƀĭn phung khua bi ala ƀuôn prŏng Hà Nội; Thừa Thiên Huế, lehanăn čar An Giang bi êdah dŭm boh tŭ dưn jăk, lehanăn mă klei hriăm êjai mơ̆ng klei mđĭ bilar knhuah gru dhar kreh, êjai hlăm klei rŭ mdơ̆ng lehanăn mđĭ kyar bruă duh mkra ala ƀuôn. Pô bi ala mơ̆ng phung kreh knhâo, phung thâo lu, lehanăn phung ksiêm hriăm kơ dhar kreh mñă leh dhar kreh – anak mnuih yơh jing pô phŭn pioh kơ klei mđĭ kyar kjăp ti Việt Nam. Nai prŏng, nai prĭn bruă kreh knhâo Vũ Minh Giang, Khua kiă kriê Êpul Gơ̆ng bruă kreh knhâo, lehanăn mjuăt bi hriăm, Sang hră gưl prŏng ala čar Hà Nội mñă klă klei tŭ jing hlăm bruă mđĭ kyar lăn čar, anăn jing lŏ kuč mngač, bi kơrŭ ai êpa mhao mơ̆ng djuê ana. Klei êpa mhao anăn srăng truh kơ klei đăo knang, lehanăn srăng mjing dŭm klei ktang mơ̆ng pô:“Hdră yuôm bhăn hĭn tal êlâo lŏ bi mlih mrâo klei mĭn bi thâo săng hĭn. Êlâo hĭn, bi jiă knhuah gru dhar kreh pô, amâo mâo djŏ knŏng kơ klei thâo săng kơ dhar kreh mjing atur kơ yang ƀuôn jing ai êwa kơ sa djuê ana. Hlăm ênuk ară anei dhar kreh amâo mâo djŏ knŏng jing ngăn dưn pioh kơ drei bi kriê pioh, ƀiădah thâo mpŭ dưn yua ai ktang êun juat anei mơ̆ng lăn čar čiăng dưi pŏk mlar hĭn klei bi hgŭm lehanăn bi ktưn hŏng klei ênuah dlông rŏng lăn”.

Blŭ hrăm ti anôk bi kƀĭn k’iăng khua knŭk kna Vũ Đức Đam ăt mñă, bruă hlue ngă dŭm hdră êlan kơ dhar kreh truh kơ thŭn 2030 jing lŏ bi kơrŭ ai tiê êpa mhao hlăm jih djuê ana, lŏ dơ̆ng kuič ai êwa bi ktang hŏng klei mbruă, mâo klei bi mguôp kjăp hlăm jih jang phung ƀuôn sang čiăng dưi mâo klei mđĭ kyar pral lehanăn kjăp. Čiăng dưi ngă klei anei, phung ngă bruă dhar kreh, bi klă sĭt ba akŏ kơ knhuah dôk dơ̆ng ƀơng huă jăk:“Jih jang mnuih mâo klei bi mni siam, mdrŏng sah, thâo hră mơar amâo mâo ƀuh ôh jing tŭ dưn hĭn hŏng klei mđĭ ai jing mnuih mâo klei kreh dhar. Kâo čang hmăng kơ djăp gưl, dhar bruă mâo klei mđing hĭn kơ dhar kreh. Pioh kơ dhar kreh lu mmông hĭn, lu ai dưi dưn yua hĭn. Čiăng mđĭ klei tŭ dưn bruă dhar kreh djuê ana Việt Nam, snăn brei drei mđĭ hĭn klei thâo luă gŭ, kñăm čiăng mđĭ hĭn knuih k’hưm kơ djuê ana. Hmei đăo knang sĭt srăng dưi rŭ mdơ̆ng, mđĭ kyar lăn čar hŏng klei kjăp lehanăn mâo dhar kreh hing ang mơ̆ng Việt nam srăng guh mngač, trơ̆ng mngač mbĭt hŏng dhar kreh anak mnuih”.        

Mă mơ̆ng 6 klei hriăm mâo hrŏng leh, klei bi kƀĭn kơ dhar kreh kluôm ala bi tŭ ư leh mta kñăm, tă êlan lehanăn mâo hdră phŭn kñăm rŭ mdơ̆ng lehanăn mđĭ bi lar jih jang klei tŭ dưn dhar kreh, ai ktang anak mnuih Việt Nam hlăm wưng kơ anăp. Hlăm anăn mđing mkŏ mjing dhar kreh lehanăn anak mnuih Việt Nam mâo klei đĭ kyar kluôm ênŭm, anăp truh kơ klei jing anak mnuih tŭ dưn sĭt êmĭt, jiă ai tiê thâo mpŭ kơ djuê ana, mâo klei hnŭk êngiê, klei kreh knhâo lehanăn thâo bi khăp. Khua hlăm Êpul gĭt gai Đảng, khua kiă kriê bruă hâo hưn gưl dlông Nguyễn Trọng Nghiã lač:“Mđing ksiêm duah, bi klă lehanăn hlue ngă klei tŭ dưn kơ lăn čar, klei tŭ dưn mơ̆ng dhar kreh, boh nik klei tŭ dưn mơ̆ng anak mnuih Việt Nam mđrĭng hŏng klei kriê pioh, bi lar klei tŭ dưn gŏ sang găp djuê Việt Nam hlăm ênuk mlih mrâo. Duh mĭn kơ bruă mjuăt mjing anak mnuih Việt Nam đĭ kyar kluôm dhuôm, boh nik mjuăt bi hriăm klei thâo khăp kơ lăn čar, myưn m’ang kơ djuê ana, mâo knhuah dôk dơ̆ng ƀơ̆ng huă jăk, mâo ai tiê thâo khăp. Mbĭt hŏng bruă rŭ mdơ̆ng, mjuăt bi hriăm knhuah hdĭp jăk bi hlue ngă mơh kơ klei dưi êngiê anak mnuih, klei dưi lehanăn bruă čuăn phŭn kơ grăp čô mnuih”./.