VOV4.Êđê- Lŏ dơ̆ng hlăm hdră kơ klei bi kƀĭn prŏng Êpul gơ̆ng AIPA tal 42, hrue mbrue (24/8) mkŏ mjing leh klei bi kƀĭn dhar bruă kđi čar, Dhar bruă duh mkra lehanăn yang ƀuôn. Klei bi kƀĭn kơ bruă kđi čar bi trông kơ 3 mta bruă: Hyuă hĭn bruă răng mgang klei êđăp ênang êlan mạng, lehanăn răng kriê ênoh mâo anăp truh sa anôk ngă bruă hlăm êlan mạng kjăp hlăm ASEAN, mtrŭt mđĭ bruă răng mgang anak mnuih hlăm bruă mrô kluôm ASEAN, lehanăn mđĭ hĭn klei bi mguôp phung ngă bruă kƀĭn ala anăp truh kơ sa yang ƀuôn ASEAN bi mguôp kjăp. Êpul bi ala bruă kƀĭn ala Indonesia lŏ mbŏ kơ anăn hlăm bruă mjêč đru kơ ala čar Myanmar. Kơ klei bi kƀĭn bruă duh mkra: Bi trông kơ 2 mta bruă. Anăn jing: Mđĭ hĭn klei ñŭ kma bruă duh mkra ASEAN hlăm hdră ba yua bruă mrô hlăm dŭm anôk duh mkra điêt lehanăn man dưn, lŏ krŭ wĭt bruă duh mkra êdei kơ klei ruă tưp Covid 19: Hgŭm bruă hiu čhưn ênguê hlăm ASEAN. Ti anôk bi kƀĭn anei, Êpul Việt Nam srăng krŭ wĭt lehanăn mđĭ kyar bruă hiu čhưn ênguê hlue klei bhiăn mđĭ kyar kjăp kluôm ênŭm. Ksiêm duah, lehanăn mkra mjing lu mta mnơ̆ng kơ bruă hiu čhưn ênguê, êdei kơ klei ruă tưp. Klei bi kƀĭn kơ bruă yang ƀuôn bi trông kơ 3 mta klei. Anăn jing: hyuă kjăp bruă hgŭm mđĭ kyar mrô, bi hrŏ klei hmăi amâo mâo jăk mơ̆ng yan adiê bi mlih; čoh čuăn dŭm mta kñăm mđĭ kyar kjăp tar rŏng lăn, hlue ngă tŭ jing ti gưl ala čar; bruă klam kdrăp mrâo mjing klei găl kơ phung ƀuôn sang nao hlăm klei ruah khua lu hĭn./.   

Pô mblang: Y-Khem Niê