VOV4.Êđê- Hruê 19/8 mbruê, Êpul gơ̆ng bruă mnuih ƀuôn sang čar Dak Nông gưl IV, wưng thŭn 2021 – 2026 mphŭn pŏk klei bi kƀĭn tal 2. Hluê si klei hưn ti anôk bi kƀĭn, 6 mlan akŏ thŭn 2021, kluôm čar mâo 7 êpul hnơ̆ng čuăn mđĭ kyar bruă duh mkra ala ƀuôn mâo hnơ̆ng đĭ kyar man dưn. Hnơ̆ng đĭ kyar kluôm mơ̆ng čar đăo tĭng 6,03%. Hnơ̆ng hrui wĭt ngăn prăk knŭk kna mâo 1.582 êklai prăk đĭ 29% mkă hŏng wưng anei thŭn 2020 lehanăn mâo 50% klei đăo tĭng mâo grăp alŭ wăl jao.

Khă snăn, kyua klei ruă Covid 19 dôk mâo dleh dưi ksiêm dlăng hmăi leh prŏng truh kơ hdră mđĭ kyar bruă duh mkra – ala ƀuôn mơ̆ng čar. Ti klei bi kƀĭn anei, phung bi ala ksiêm dlăng, bi mklă leh lu mta phŭn yuôm bhăn. Khua Êpul gơ̆ng bruă mnuih ƀuôn sang čar Dak Nông brei thâo, klei bi kƀĭn tal anei mâo lu bruă yuôm bhăn. Kyua anăn, dŭm gưl, dhar bruă brei mđing gĭr ktưn hĭn, mâo hdră msir, hdră ngă bruă mrâo, tŭ dưn hĭn, djŏ guôp hŏng wưng klei ruă Covid 19 dôk mâo dleh dưi ksiêm dlăng čiăng hluê ngă tŭ dưn hdră kčah mđĭ kyar bruă duh mkra – ala ƀuôn mơ̆ng čar./.

Pô mblang: H’Nêč Êñuôl