VOV4.Êđê- Ti ƀuôn prŏng phŭn Hà Nội dôk mkŏ mjing Klei bi kƀĭn tal sa mơ̆ng anôk bruă kƀĭn ala gưl XV. Klei bi kƀĭn tal anei mâo boh tŭ yuôm bhăn, mjing atur knơ̆ng kơ hdră mă bruă mơ̆ng Anôk bruă kƀĭn ala gưl 15 srăng mkŏ mjing hdră ruah, bi mklă hdră kčah mđĭ kyar bruă duh mkra, ala ƀuôn, bruă ngăn prăk, bruă duh bi liê knŭk kna, hdră kñăm ala čar, mjing jar kluôm kơ bruă pŏk hluê ngă hlăm wang 5 thŭn ti anăp.

Klei mkŏ mjing, dăp phung khua prŏng mơ̆ng Knŭk kna jing boh phŭn hlăm klei bi kƀĭn tal êlâo hlăm wưng păn bruă kơ Bruă kƀĭn ala gưl 15. Hluê si klei kčah mtrŭn mơ̆ng Hdră bhiăn phŭn thŭn 2013, leh dưi mâo Bruă kƀĭn ala ruah, Khua bruă kƀĭn ala, Khua lăn čar, Khua Knŭk kna, Khua Sang phat kđi gưl dlông srăng ngă klei đĭ păn bruă ti anăp bruă kƀĭn ala. Jih jang mâo 50 čô anăn khua prŏng mơ̆ng dŭm anôk bruă knŭk kna mâo Bruă kƀĭn ala ruah, bi mklă hlăm klei bi kƀĭn anei. Hjăn Knŭk kna, hlăm klei bi kbĭn anei bi leh bruă čuăn ruah 4 čô K’iăng Khua knŭk kna. Khua Anôk bruă kơ phung bi ala bruă kƀĭn ala Nguyễn Thị Thanh brei thâo, phung khua prŏng dưi hưn mthâo kơ Anôk bruă Đảng gưl dlông leh anăn Phŭn bruă kđi čar bi klă, čiăng kơ dŭm Hdră djŏ tuôm kơ dŭm mta anăn phung khua prŏng hlăm Bruă kƀĭn ala leh anăn Hdră dăp mnuih mă bruă hlăm Knŭk kna:

“Mkŏ mjing hdră, mnuih mă bruă Knŭk kna srăng bi leh 27 čô khua prŏng mâo: Khua Knŭk kna, 4 čô K’iăng khua knŭk kna leh anăn 18 čô khua phŭn bruă, 4 khua dŭm anôk bruă bi knar hŏng phŭn bruă. Hdră anei dưi tĭng mklă, ksiêm dlăng bi nik mơ̆ng tur knơ̆ng ksiêm dlăng wưng mơ̆ng knŭk kna 2016-2021 leh anăn mơ̆ng atur knơ̆ng ksiêm dlăng kluôm kơ bruă dăp phung knuă druh.”

Phŭn pŏk klei bi kƀĭn tal sa, Bruă kƀĭn ala gưl XV

 Bruă bi leh jih jang klei dăp mnuih mă bruă knŭk kna jing amâo dưi ngă êmưt ôh. Klei anei brei mâo bruă klam mơ̆ng grăp čô bi ala hlăm grăp boh phŭn klei bi kƀĭn, boh nik hlăm klei ruah, bi mklă, jao kơ 50 čô khua prŏng hlăm dŭm anôk bruă Knŭk kna. Khua bi ala Phạm Văn Hòa, êpul Đồng Tháp brei thâo:

“Bruă klam mơ̆ng grăp čô bi ala brei ktuh êyuh jih ai tiê čiăng bi êdah klei mnuih ƀuôn sang đaŏ knang hlăm klei bi kƀĭn. Êlâo hĭn brei ruah 50 čô kmeh gơ̆ng. Khua bruă kƀĭn ala, phung K’iăng Khua bruă kƀĭn ala, phung hlăm êpul. Khua lăn čar, K’iăng Khua lăn čar, khua Knŭk kna, K’iăng Khua knŭk kna, phung khua hlăm knŭk kna; Sang phat kđi; Dhar bruă ksiêm yap… Kâo lač anei jing bruă yuôm bhăn snăk.”

Mbĭt hŏng klei dăp mnuih mă bruă, Bruă kƀĭn ala srăng bi mklă dŭm bruă duh mkra-ala ƀuôn, ngăn prăk knŭk kna 6 mlan êgao leh anăn hdră tă, hdră ngă bruă kơ 6 mlan knhal jih thŭn, boh nik Hdră kơ kluôm wưng păn bruă gưl 15. Anăn jing hdră kơ klei mđĭ kyar bruă duh mkra- ala ƀuôn, kơ klei duh bi liê knŭk kna, kơ ngăn prăk, boh nik prăk nư knŭk kna leh anăn dŭm bruă djŏ tuôm kơ ngăn prăk wưng thŭn 2021-2025. Anei jing dŭm bruă yuôm bhăn, mjing atur knơ̆ng kơ bruă hluê ngă “hdră kñăm mdua” mdrơ̆ng hŏng klei ruă tưp êjai, mđĭ yar bruă duh mkra ala ƀuôn êjai, hlăm klei dưi mơ̆ng Bruă kƀĭn ala hluê si hdră bhiăn. Khua čih hră, Khua adŭ bruă anôk Bruă kƀĭn ala Buì Văn Cường bi mklă:

“Tơdah Bruă kƀĭn ala amâo bi mklă ôh Hdră 5 thŭn kơ bruă duh mkra ala ƀuôn srăng dleh kơ Knŭk kna hlăm klei pŏk gĭt gai klă klơ̆ng bruă knuă. Anei jing klei bhiăn Hdră mtrŭn Klei bi kƀĭn tal 13 mơ̆ng Đảng. Bruă kƀĭn ala jing anôk bruă mâo klei dưi knŭk kna prŏng hĭn, brei bi mklă dŭm hdră êlan kơ klei mđĭ kyar bruă duh mkra - ala ƀuôn. Tơdah Bruă kƀĭn ala êmưt bi mklă snăn kơ klei duh bi liê knŭk kna srăng dleh dlan, ƀrư̆ êmưt snăn ƀrư̆ ngă kơ bruă mđĭ kyar êmưt đĭ kyar hĭn.”

Khua bruă kƀĭn ala Vương Đình Huệ blŭ hrăm mphŭn pŏk klei bi kƀĭn

Khăgơ̆ dôk hmaĭ mơ̆ng klei ruă Covid-19 hŏng klei ruă tưp dleh ktuê dlăng, ƀiădah hlăm hdră kčah bruă duh mkra ala ƀuôn, Knŭk kna ăt lŏ dơ̆ng gĭr ktưn hluê ngă Hdră kñăm mdua čiăng kơ bruă duh mkra lŏ wĭt đĭ kyar. Knŭk kna  bi tŭ ư hưn mdah hŏng Bruă kƀĭn ala ka mkra mlih hdră kñăm, hnơ̆ng kčah mđĭ kyar bruă duh mkra ala ƀuôn thŭn 2021 kčah leh jing GDP đĭ kyar mơ̆ng 6-6,5%. K’iăng Khua knơ̆ng bruă duh mkra mơ̆ng Bruă kƀĭn ala Nguyễn Văn Sơn hlak blang:        

         “Amâo mkra mlih hnơ̆ng kčah kơ klei đĭ kyar. Mta phŭn kyua dôk hluê ngă Hdră mtrŭn 124 mơ̆ng Bruă kƀĭn ala čiăng hluê ngă bi knar dŭm bruă klam, hdră msir mơ̆ng Bruă kƀĭn ala gưl 14 jao kơ Knŭk kna. Hlăm wưng anăn Bruă kƀĭn ala ksiêm dlăng kluôm jih ai tiê leh anăn thâo êlâo dŭm mta hmaĭ mơ̆ng klei ruă Covid-19 truh kơ bruă duh mkra leh anăn ăt ba mdah čiăng gĭr ktưn jăk hĭn hlăm wưng kơ anăp čiăng dưi ngă hdră kñăm, klei tŭ kčah leh.”

Ciăng rơ̆ng klei tŭ jing klei bi kƀĭn ta sa, dŭm anôk bruă Bruă kƀĭn ala, knŭk kna, dŭm anôk bruă hdră bhiăn bi hgŭm dưi mâo klei tŭ ư hŏng dŭm boh phŭn hưn mdah mơ̆ng Bruă kƀĭn ala. Hlăm boh klei ruă tưp Covid-19 dleh ktuê dlăng, Bruă kƀĭn ala hưn mdah leh hŏng Phŭn bruă kđi čar leh anăn kƀĭn hlăm Adŭ bi kƀĭn Diên Hồng hŏng klei mkiêt mkriêm jih hnơ̆ng mmông bi kƀĭn leh anăn mâo klei tŭ dưn jăk hĭn, êđăp ênang hĭn. Hdră kơ klei bi kbĭn dưi bi hrŏ 5 hruê mkă hŏng klei mĭn tĭng, mă bruă wăt hruê mdei. Phung bi ala Bruă kƀĭn ala hriê mơ̆ng 19 alŭ wăl mâo klei ruă tưp dưi drông hjăn, dôk hlăm sang jưh hjăn leh anăn bi kƀĭn hjăn hlăm sa anôk hlăm adŭ bi kƀĭn Diên Hồng. Khua čih hră, Khua adŭ bruă Bruă kƀĭn ala Bùi Văn Cường lŏ brei thâo:

Kơ klei bhiăn, mnuih hlăm dŭm alŭ wăl bi ktlah hjăn hluê si asăp mtrŭn 16 tơdah wĭt ti Hà Nội, tơdah mnuih ƀuôn sang brei bi ktlah hjăn, ƀiădah Khua Knŭk kna bi mklă hŏng phung bi ala Bruă kƀĭn ala ksiêm mkă leh 3 blư̆ amâo ƀuh kman, tlŏ leh vaccin snăn dưi nao hlăm klei bi kƀĭn Khădah ăt brei hluê ngă bi jăk klei kčah mtrŭn gang mkhư̆ klei ruă Covid-19. Ară anei hmei mâo hdră gang mkhư̆, tơdah ƀuh phung bi ala mâo klei bi knăl snăn mâo adŭ bi ktlah hjăn, ƀiădah ăt nao hlăm dŭm boh phŭn klei bi kƀĭn leh anăn mplĕ hră msĕ yăng đar.”

Phung bi ala kluôm ala dôk ktuê dlăng leh anăn đaŏ knang, Klei bi kƀĭn tal sa, Bruă kƀĭn ala gưl 15 dưi mkŏ mjing êđăp ênang, tŭ jing. Anei jing klei bi kƀĭn yuôm bhăn, tơdah hluê ngă jăk srăng đru mđĭ kyar bruă duh mkra- ala ƀuôn lăn čar, boh nik hluê ngă hdră kñăm mdua, mđĭ kyar bruă duh mkra êjai, mdrơ̆ng hŏng klei ruă Covid-19 tŭ dưn êjai./.

Pô mblang: H’Zawut Ƀuôn Yă